İran "Nabucco"ya can atır

İran "Nabucco"ya can atır
İran Avropa Birliyinə qaz sahəsində sıx əməkdaşlıq təklif edib. Bu barədə İranın xarici işlər nazirinin müavini Mehdi Səfərinin Avropa Parlamentində çıxışı zamanı bildirib. İran həm Avropaya qaz satmağa, həm də tranzit xidmətləri həyata keçirməyə hazırdır.
"Biz energetika haqqında danışdıq. Parlament nümayəndələri bu məsələni qaldıranda mən dedim: bəli, əlbəttə, İran AB ilə əməkdaşlığa hazırdır",- Səfəri bildirib.
Tehranın təklifi Avropaya zərbə vurmuş Rusiya-Ukrayna qaz böhranından dərhal sonra səslənib. AB yeni ixracçılarda və tranzit marşrutlarında maraqlı olduğunu gizləmir; "Nabucco" layihəsi çərçivəsində Orta Asiya və Yaxın Şərqdən qaz idxalına xüsusi əhəmiyyət verilir.
Lakin İranın bu layihədə mümkün rolu hələlik müəyyən edilməyib: Tehrana qarşı onun nüvə proqramı ilə bağlı tətbiq edilmiş beynəlxalq sanksiyalar var.