Abdullah Gülün Moskvada səfərdə olduğu bir vaxtda erməni mənbələrindən belə xəbər yayıldı
"Azadlıq" radiosunun Ermənistan xidməti Türkiyənin Ermənistanla münasibətləri normallaşdırmaq üçün Qarabağla bağlı şərtindən vaz keçdiyi barədə məlumat yayıb. Radio Ermənistan-Türkiyə danışıqlarında iştirak edən şəxslərdən birinin sözlərinə əsaslanaraq bildirib ki, Ankara İrəvanla rəsmi münasibətlər qurmaq və sərhədləri açmaq üçün əvvəl irəli sürdüyü şərtlərdən biri olan işğal altındakı Azərbaycan torpaqlarının azad edilməsi tələbindən imtina edib.
Radio iddia edir ki, hazırda Türkiyə hökumətinin yeganə şərti 1915-ci il hadisələrinin araşdırılması üçün tarixçilərdən ibarət birgə komissiyanın yaradılmasıdır. Ermənistan prezidenti Serj Sərkisyanın bu şərtə müsbət yanaşdığı, ancaq daşnakların və diaspora nümayəndələrinin bundan narahat olduqları və dövlət başçısına xəbərdarlıq etdikləri bildirilir. Türkiyənin Azərbaycandakı səfiri Hulusi Kılıç APA-nın sualını cavablandırarkən hazırda Gəncədə olduğunu və Bakıya qayıtdıqdan sonra məsələ ilə maraqlanacağını deyib. O, Türkiyənin belə bir addım atacağını düşünmədiyini də əlavə edib.
Xatırladaq ki, analoji məlumatlar istər Türkiyə, istərsə də Qərb mənbələri tərəfindən əvvəllər də yayılıb. Ancaq hər dəfə rəsmi Ankara bunları təkzib edərək bildirib ki, Azərbaycan ərazilərinin işğaldan azad edilməsi Ermənistanla münasibətlər qurulması üçün şərtlərdən biridir.
Bu xəbər Türkiyənin Ermənistanla Azərbaycanla danışıqlarının intensiv xarakter aldığı bir vaxta təsadüf edir. Hərçənd rəsmi Ankara Türkiyənin Qarabağ münaqişəsinə dair danışıqlarda İrəvanla Bakı arasında vasitəçilik etməsi haqda son günlər yaılan xəbərləri təkzib edib. Türkiyə mənbələri bu vasitəçilik sayəsində Ermənistanın Qarabağda ətraf rayonların azad edilməsinə və referenduma əsaslanan nizamlama variantına müsbət baxdığı haqda xəbərlər də yaymışdılar. Türkiyə prezidenti Abdullah Gülün Moskvaya dünənki səfəri zamanı da Qarabağ məsələsinin müzakirə edildiyi bildirilir. Gül Moskvada bəyan edib ki, Rusiya Qarabağ münaqişəsinin sülh yolu ilə nizamlanmasında aparıcı rola malikdir. Onun sözlərinə görə, bütün digər amillərlə yanaşı, o, həm də ATƏT-in Minsk Qrupunun həmsədridir.
O, Moskvada Rusiya, Azərbaycan və Ermənistan prezidentlərinin iştirakı ilə keçirilmiş və Qarabağ münaqişəsinin dinc yolla həllinə dair bəyannamənin qəbul olunması ilə yekunlaşmış üçtərəfli görüşə böyük önəm verdiklərini bildirib: “Qafqazda münaqişələrin nizamlanmasında baş verən istənilən pozitiv inkişaf dərhal bütün bölgə ölkələrinə müsbət təsir edir. İstənilən neqativ dönüş isə regionun bütün oyunçularına mənfi təsir göstərir”.
Ermənistanla əlaqələrə toxunan A.Gül bəyan edib ki, Türkiyə çoxdandır bu ölkə ilə münasibətlərin normallaşdırılması yollarını axtarır və bunun üçün istənilən dialoq imkanlarından istifadə edir. Prezident futbol üzrə dünya çempionatının seçmə mərhələsi çərçivəsində Türkiyə ilə Ermənistan milli komandaları arasında keçirilən matçı xatırladıb: “Mən Ermənistana getdim və həmkarımla bu oyunu tribunadan seyr etdim. Matçdan sonra prezident Sərkisyanla çox faydalı görüş keçirdim. Çox şadam ki, İrəvanda başlanan dialoq bu gün də davam edir”.
A.Gül hesab edir ki, onun İrəvana səfəri təkcə Türkiyə ilə Ermənistan arasında münasibətlərin normallaşması prosesinə start verməyib, bu addım həm də Azərbaycanla Ermənistan arasında münasibətlərin normallaşmasına xidmət edəcək: “Mən bu çətin düyünlərin açılmasında yorulmadan səy göstərən Rusiyaya öz dərin minnətdarlığımı bildirmək istəyirəm” .
Ermənistan prezidenti isə ölkəsinin Qarabağ məsələsində güzəştə hazır olduğu haqda xəbərləri təkzib edir. Dünən İrəvanda iqtidara yaxın olan Çiçəklənən Ermənistan Partiyasının qurultayında çıxışı zamanı Serj Sərkisyan deyib ki, əgər kimsə danışıqlarda Dağlıq Qarabağ ətrafında alver getdiyini düşünürsə, dərin səhvə yol verir: “Qarabağ bizim torpağımızdır, o əvəzsizdir və alver predmeti ola bilməz”. Sərkisyana görə, münaqişə ancaq Qarabağın öz müqəddəratını təyin etməsi hüququnun tanınması şərti ilə nizamlana bilər.
F.MƏMMƏDOV
musavat
Hiç yorum yok:
Yorum Gönder