TEHRAN VƏ YEREVAN "GÖY MƏSCİD"i FARSLAŞDIRIR

TEHRAN VƏ YEREVAN "GÖY MƏSCİD"i FARSLAŞDIRIR


"Suren" maşını İran - Ermənistan işbirliyinin növbəti rəmzi sayılır


SƏDİ


Ermənistanda 1979-cu il fevral inqilabının 30-cu ildönümü ilə bağlı İran mədəniyyəti ongünlüyü keçirilir. Tədbirin açılışı Yerevandakı "Göy məscid"də gerçəkləşib. Ən təəccüblü hal odur ki, İran və Ermənistan informasiya vasitələri Azərbaycanın bu mədəni-tarixi abidəsini "fars məscidi" kimi təqdim ediblər.
İnqilabın 30-cu ildönümü çərçivəsində İran qadınlarının rəsm əsərlərinin, habelə bu ölkədə çıxan kitabların sərgisi təşkil olunub. Erməni məktəblilər arasında keçirilən "İran mənim gözümlə" müsabiqəsinə yekun vurulub. Bundan başqa "İran musiqçiləri" adı altında konsert də verilib.
İnqilabın 30 illiyi ilə bağlı İranın avtomobil sənayesi qrupunun, "İran Xodro"nun direktoru Mənuçehr Məntiqi bildirib ki, yeni avtomobilin təqdimatı keçiriləcək. Onun sözlərinə görə, yeni maşın "Suren ELX" adlanır. Direktor "Suren"in istehsalını iki ölkə arasında əməkdaşlığın dərinləşməsi kimi dəyərləndirib.
Ötən həftə "Hayastan" ümumerməni fondunun işçi qrupu İslam Respublikasına iki günlük səfər edib. Fondun icraçı direktoru Ara Vardanyan ölkəsinin İrandakı səfiri Karen Nazaryan, Tehrandakı erməni arxiyepiskopu Sepux Sarkisyan, habelə ermənilərin oradakı "Ararat" adlı idman kompleksinin rəhbərliyi ilə görüş keçirib. Bundan başqa İran - Ermənistan mədəniyyət mərkəzinin nümayəndələri, eləcə də erməni icmasının nümayəndələri ilə də görüşlər baş tutub.
Qeyd edək ki, İslam Respublikasında 100 min erməni yaşayır. Bu ilin əvvəlində isə İrandakı ermənilər Şvanidzor, Alvank və Mehriyə səfər ediblər. Ara Vardanyan vurğulayıb ki, fond gələcəkdə də İrandakı erməni icması ilə sıx əməkdaşlıq edəcək.