Rusiya Ermənistana qoşun yığır

Rusiya Ermənistana qoşun yığır

"MDB-nin Kollektiv Təhlükəsizlik Müqaviləsi Təşkilatının üzvləri arasında Ermənistan yeganə dövlətdir ki, rəhbərliyi daxili siyasi problemlərini həll etmək və hakimiyyətdə qalmaq üçün qurumun silahlı qüvvələrinə müraciət edə bilər".
Ermənistan Milli və Strateji Tədqiqatlar Mərkəzinin eksperti Manvel Sərkisyanın dediyinə görə, rəsmi İrəvanın son vaxtlar KTMT ölkələrinin birgə silahlı birləşmələri olaraq "MDB-nin NATO-su" adlandırılan Çevik Qüvvələr Korpusunun (ÇQK) bir hissəsinin Ermənistanda yerləşdiriləcəyi barədə yaydığı məlumat və açıqlamalar ölkənin demokratik qüvvələrində çox ciddi narahatlıq doğurur.
"Prezident Serj Sərkisyan çox böyük məmnuniyyətlə İrəvanda ruslar və özbəklərdən ibarət 1000 nəfərlik hərbi birləşməyə ver verər. Unutmayaq ki, MDB-nin Kollektiv Təhlükəsizlik Müqaviləsi Təşkilatının (KTMT) Çevik Qüvvələr Korpusunun yaradılması barədə birgə bəyannamədə deyilir: "Bu qüvvələr terrorizm və narkobizneslə mübarizə məqsədilə yaradılır". Yalandır. 15 minlik kontingent postsovet məkanı və ya Orta Asiya bir yana dursun - heç Cənubi Qafqazda da normal əməliyyat keçirə bilməz. Rusiyanın Çeçenistanda 60 minlik hərbi qüvvəsi var, amma çeçen mücahidlər hələ də fəaldır və ruslar onların öhdəsindən gələ bilmirlər", - M.Sərkisyan bildirib.
Onun dediyinə görə, Çevik Qüvvələr Korpusu (ÇQK) müqaviləni imzalamış ölkələrdə polis funksiyalarını yerinə yetirmək, etiraz aksiyalarını dağıtmaq, müxalifəti qorxutmaq və sosial narazılıqları əzmək məqsədilə yaradılır".
Rusiyanın bilavasitə rəhbərliyi və təzyiqləri ilə KTMT-yə üzv dövlətlərinq ÇQK-nin yaradılması barədə sənəd imzalanmasına vadar edilməsi əslində MDB çərçivəsində yeni hərbi-siyasi blokun yaradılması ilə yanaşı, Kremlin özünə müttəfiq etməyə çalışdığı ölkələrin hakimiyyət dairələrinə "təhlükəsizlik indulgensiyası" verməsi də sayıla bilər.
Müşahidəçilərin fikrincə, Rusiya bu minvalla Türkmənistan, Qazaxıstan, Özbəkistan, Belarus, Ermənistandakı yarıdiktatura tipli rejimləri sakitləşdirərək, onları Qərbə doğru meyllənmədən uzaqlaşdırmaq, hakimiyyətlərinin dayanıqlılığına təminat verdiyini göstərmək niyyətindədir.
NATO-nun Şərqə doğru genişlənməsinə, xüsusilə də Cənubi Qafqazda Azərbaycan və Gürcüstanın Şimali Atlantika Alyansı ilə əlaqələrinin sürətlə güclənməsinə cavab olaraq Rusiya ötən ilin sonlarında Ermənistana $800 milyonluq silah, sursat və hərbi texnika verərək regionda qüvvələr balansını ermənilərin, həm də öz xeyrinə dəyişməsinə can atmaqla yanaşı, Orta Asiya ölkələrindən də ABŞ və NATO güclərini bütünlüklə çıxarmaq, Şimali Atlantika Alyansının Əfqanıstana tranzit yükdaşıma ilə əlaqədar region dövlətlərindəki bazalarını bilmərrə bağlatdırmaq istəyir.
Bütün bunlarla bahəm, ÇQK-in Ermənistanda yerləşdirilməsi ilə bağlı iddialar və İrəvandakı hakim rejimin də buna ikiəlli razı olması ermənilərin Dağlıq Qarabağ münaqişəsinin dinc yolla nizamlanmasına yönəlmiş danışıqlar prosesində "çevik qüvvələr" kartından yararlanmaq istəyini ortaya qoyur.
Ermənistan mediası ÇKQ nəzdindəki birliklərdən bəzilərinin Ermənistan-Azərbaycan sərhədində də yerləşdirilə biləcəyini istisna etmirlər. Ermənistan Müdafiə Nazirliyi bu xəbərləri nə təsdiq, nə də təkzib etmir.
Azərbaycanın Müdafiə Nazirliyindən "Ekspress"ə verilən açıqlamada isə bildirildi ki, qurum Ermənistandakı prosesləri və ÇQK ilə bağlı situasiyanı diqqətlə izləyir: "Narahatlıq üçün ciddi əsas görmürük. Ermənistanın tutduğu mövqe və davranışı onsuz da məlumdur. Rusiyanın isə Ermənistan-Azərbaycan sərhədlərinə hərbi birləşmələr yığacağını düşünmürük".
Bizim MN-dən fərqli olaraq, Gürcüstan hərbçiləri narahatdır. Gürcüstan Müdafiə Nazirliyinin ictmai əlaqələr departamentindən əməkdaşıma verilən açıqlamaya görə, rəsmi Tiflis Ermənistanla Rusiya arasındakı hərbi əməkdaşlığın intensivləşməsini regionda qüvvələr nisbətini dəyişməyə yönəlmiş səylər hesab edir: "Rusiya bölgədə möhkəmlənmək, öz maraqlarını təmin edərək mənafelərini region ölkələrinə istənilən yolla qəbul etdirmək üçün var qüvvəsini ortaya qoyub. Belə şəraitdə laqeydlik nümayiş etdirə bilmərik və yaranmış situasiyada NATO ilə əməkdaşlığını daha da gücləndirməyi məqbul bilirik".
Bu arada Rusiyanın Şimali Qafqaz Hərbi Dairəsində KTMT-nin Çevik Qüvvələr Korpusuna qatılmaq üçün əlahiddə alayın formalaşmasına başlanıb. Alayda xidmət edəcək sıravilərin tam əksəriyyəti müqavilə əsasında qulluqda olan hərbçilərdir. Onlar martın ortalarında yeni dislokasiya yerinə göndərilmək üçün hazır olacaqlar.

Humay