KİNO HƏVƏSKARLARI POLİSİN və ETTELAAT QÜVVƏLƏRİNİN HÜCUMUNA MƏRUZ QALIB

KİNO HƏVƏSKARLARI POLİSİN və ETTELAAT QÜVVƏLƏRİNİN HÜCUMUNA MƏRUZ QALIB

İran polisi və ETTELAAT əməkdaşları fevralın 10-da Tehranın «İstiqlal» kinoteatrı qarşısında növbə tutan şəxslərə hücum çəkib. 1500-dək kino həvəskarı «Fəcr» kinofestivalı çərçivəsində nümayiş etdirilən, gənc aktrisa Gülşiftə Fərahaninin oynadığı «Eli haqqında» filminə bilet almaq istəyirmiş. 1500-dək kino həvəskarına qəfil hücumda yaralananlar var. Bəzi şəxslər tutularaq naməlum istiqamətə aparılıb.

Hökumət qüvvələrinin tamaşaçıları kobud şəkildə döyməsi və onları dağıtmaq üçün gözyaşardıcı qazdan istifadə etməsi filmdə oynayan G.Fərahani ilə əlaqələndirilir. İran prezidenti Mahmud Əhmədinejad ölkədə qadağan olunmuş «Eli haqqında» filminin festivalda nümayiş etdirilməsinə xarici basqılardan sonra icazə vermişdi.

Bir neçə ay əvvəl Nyu-Yorkda Ridli Skottun «Yalanlar məcmuəsi» adlı filminin premyerasına hicabsız qatılan G.Fərahani jurnalistlərə açıqlamasında İranı həmişəlik tərk etdiyini və bir daha ölkəsinə qayıtmayacağını bildirmişdi: «Mən bu filmə çəkildiyimə görə çox problemlərlə üz-üzə qaldım. İran rəsmiləri pasportumu alaraq xarici səfərimə mane olmağa çalışırdılar. ETTELAAT əməkdaşları isə dəfələrlə sorğu-suala çəkərək mənə əziyyət verirdilər».




qaynaq:«Media forum»