General-leytenant Rail Rzayevin qətli kimə, kimlərə gərək ola bilərdi? Mülahizələrini «Media forum»la bölüşən Təhlükəsizlik Araşdırmaları Mərkəzinin rəhbəri, istefada olan Milli Təhlükəsizilk Nazirliyi zabiti İlham İsmayıl deyir ki, motiv olmadan cinayət törədilmir: «Təsadüfən kimsə öldürülmür, o ki qala general». Mərkəz rəhbəri daha çox general-leytenant Rail Rzayevin ordu iyerarxiyasında perspektivli olduğu üçün aradan götürülməsi versiyası üzərində dayanmağı üstün bilir. İ.İsmayıl mərhum generalın tezliklə yüksək posta, hətta müdafiə naziri vəzifəsinə irəli çəkilməsi ehtimalına qurban getdiyi versiyasını istisna etməyib: «Qətlin baş verməsinə səbəb olan versiyalardan daha tutarlısı bunu hesab edirəm. Görünür, bu ərəfədə onun aradan götürülməsi kimlərəsə lazım idi». Ancaq İ.İsmayıl generalın qətlini siyasi qətl hesab etmir: «Rail Rzayev siyasətlə məşğul olmayıb. Siyasi proseslər də elə bir gərgin nöqtədə deyil ki, belə mülahizə irəli sürəsən. Siyasətlə bağlı olsaydı, artıq indidən bu hadisəni siyasi şouya çevirmişdilər. Mənə elə gəlir ki, qətldə siyasi motiv yoxdur». İ.İsmayıl ikinci versiya kimi generalın xidməti tabeçiliyində olan şəxslərlə rəftarında gərginlik yaranması versiyasını irəli sürür: «Ola bilər ki, kimsə işdən çıxarılıb, kiminsə rütbəsi geçikdirilib. Qətli gerenalın tabeçiliyində olmuş, yaxud nazirlikdəki şəxslərdən biri törədə bilər. Ciddi təhqiqat aparılmalı, bütün versiyalar yoxlanılmalı, hətta şəxsi, məişət zəmnində nə baş veribsə, araşdırılmalıdır». Hadisənin dövlət başçısı İlham Əliyevin ölkədə olmadığı vaxtda baş verdiyinə toxunan İ.İsmayıl belə bir sual ortaya qoyub: «Məgər prezident ölkədə olsaydı, bu qətlin qarşısını almaq mümkün olacaqdı? Bizə məlum olmayan başqa nüanslar da var. Bəlkə dövlət başçısı ölkəyə qayıdan kimi generalla bağlı fərman imzalayacaqdı?!. Belə ehtimalların hamısına diqqət yetirmək lazımdır. Siyasi fiqur olmayan, siyasi hakimiyyət institutlarında yer almayan bir şəxsin qətlinin dövlət başçısının ölkədə olub-olmamasıyla əlaqəsi yoxdur. Məncə, generalın perspektivi məsələsi versiyası daha inandırıcı görünür». İ.İsmayılın fikrincə, Azərbaycanda dövlətçilik hissləri ilə pul, mənsəbpərəstlik hissləri təzad təşkil edir: «Qatillər, sifarişçilər qətli törədəndə dövlətçilik prinsiplərini, dövlət başçısını, onun hakimiyyətini deyil, şəxsi mənafelərini düşünürlər». Mərkəz rəhbəri hesab edir ki, cinayəti törədən şəxs bu qətlə hazır olub: «Belə təcrübəli, ali rütbəli zabit, general özünə qarşı bir təhlükə hiss etsəydi, əlavə mühafizə dəstəsiylə hərəkət edərdi. Amma Rail Rzayevin mühafizəsi olmayıb. Yanında yalnız sürücüsü olub». İstefada olan MTN zabiti qətldə xarici faktorların iştirakına inanmır: «Ayrı-ayrı zabitlər xarici faktorları əngəlləmək, perspektivdə planlaşdırılan hansısa hadisələri önləmək gücündə deyillər. İnandırıcı görsənmir ki, Rail Rzayev hansısa xarici faktorları əngəlləyə bilərdi». İ.İsmayıl inanmaq istəyir ki, bu qətlin üstü tezliklə açılacaq: «Amma çox təəssüf ki, Azərbaycanda baş vermiş oxşar qətllərin üstü hələ də açılmayıb. Çox nadir hallarda belə cinayətlər açılır». Ekspert təəssüf hissiylə onu da qeyd edib ki, axırıncı dəfə döyüş zamanı həlak olan generalımız Həzi Aslanov olub: «1978-ci ildə daxili işlər naziri Arif Heydərov və onun müavini Səlahəddin Kazımov terror nəticəsində öldürüldü. İsmət Qayıbov, Məhəmməd Əsədov erməni terroru nəticəsində həlak oldular. Kontr-admiral Eduard Hüseynov 1993-cü ildə güllələndi, Vahid Musayev daxili qiyamların qurbanı oldu. İndi də 17 il Azərbaycanın Hərbi Hava Qüvvələrinə, Hava Hücumundan Müdafiə Qoşunlarına komandanlıq etmiş şəxsi öldürdülər. Çox təəssüf ki, peşəkar bir generalımızı itirdik». «Media forum»
Hiç yorum yok:
Yorum Gönder