“Azərbaycan büdcəsində ən çox vəsait müdafiə sahəsinə ayrılır və Dağlıq Qarabağ münaqişəsi həll olunana qədər bu siyasət davam edəcək”.
APA-nın məlumatına görə, bu sözləri Azərbaycan prezidenti İlham Əliyev Rusiyanın İTAR-TASS agentliyinə müsahibəsində deyib. O, Azərbaycanda heç vaxt hərbi-sənaye kompleksi olmadığını və son illərdə yaradıldığını bildirib: ”Bu gün Azərbaycan ordusu istənilən vəzifəni - ilk növbədə işğal olunmuş ərazilərin azad edilməsi vəzifəsini yerinə yetirməyə qadir olan qüdrətli bir strukturdur. Azərbaycan bu potensiala Sovet İttifaqı dağıldıqdan sonra sahib olsaydı, torpaqlarımız heç vaxt işğal edilməzdi”. Bununla yanaşı, İ. Əliyev danışıqlar prosesinin resurslarının hələ tükənmədiyini və münaqişənin sülh yolu ilə həllinə ümid qaldığını söyləyib: “Münaqişə mərhələli həll olunmalıdır. Birinci mərhələdə Dağlıq Qarabağın ətrafında işğal olunmuş 7 rayon azad edilməlidir. Sonrakı mərhələdə isə Dağlıq Qarabağın statusu müəyyənləşdirilməlidir. Bu status Azərbaycanın ərazi bütövlüyü çərçivəsində və heç vaxt indiki kimi monoetnik olmamış Dağlıq Qarabağın əhalisi üçün yüksək dərəcəli muxtariyyət nəzərə alınmaqla müəyyən edilməlidir. Bizə elə gəlir ki, danışıqların hazırkı formatı bu yanaşmaları əks etdirir. Hazırda Ermənistanda yeni rəhbər fəaliyyət göstərir və İrəvanın bu məsələyə daha konstruktiv yanaşacağına ümid var”.
Hiç yorum yok:
Yorum Gönder