"Əlimizdə olan məlumatları dərc etmişik, doğruluğuna da əminik". Türkiyənin "Hürriyyət" qəzetinin Ankara xəbər müdiri Saffet Qorxmaz fevralın 10-da bu nəşrdə çıxan "Qarabağ planı" başlıqlı xəbərlə bağlı reaksiyaları "Media forum"a dəyərləndirərkən belə deyib. O qeyd edib ki, xəbərin dərcindən iki gün keçib və hələ kimsə qəzetə təkzib verməyib: "Kimsənin bizdən təkzib tələbi də olmayıb".
"Hürriyyət"in Ankara bürosundan Uğur Erganın hazırladığı həmin yazıda Türkiyənin də səyləriylə Qarabağ münaqişəsi ilə bağlı bəzi məsələlərdə həllə yaxınlaşıldığı bildirilib. Yazıda qeyd olunub ki, xarici işlər naziri Əli Babacan ötən həftə Münhendə Serj Sərkisyan və Edvard Nalbandyanla görüşdükdən sonra azərbaycanlı həmkarı Elmar Məmmədyarovu da yanına alaraq Bakıya yola düşüb və prezident İlham Əliyevə Münhendə apardığı danışıqlarla bağlı məlumat verib.
"Hürriyyət"in xəbərinə görə, Ermənistan Dağlıq Qarabağ ətrafındakı 6 rayonu mərhələ-mərhələ Azərbaycana qaytarmağa razıdır və ilkin mərhələdə konkret 4 məsələ ilə bağlı prinsipial anlaşma var:
- Ermənistanın işğal altında saxladığı 5 rayon - Füzuli, Ağdam, Cəbrayıl, Qubadlı, Zəngilan Azərbaycana qaytarılacaq;
- evlərini tərk etmək zorunda qalmış məcburi köçkünlər yurdlarına geri dönəcək;
- Dağlıq Qarabağın statusunu müəyyənləşdirmək üçün region bir müddət müvəqqəti hökumətə veriləcək. Status müəyyənləşdikdən sonra Kəlbəcər də Azərbaycana qaytarılacaq. Bunun əvəzində Azərbaycan Ermənistanın şosse və dəmiryolunu açacaq;
- Ermənistan və Dağlıq Qarabağ arasındakı sərhəd bölgəsinə beynəlxalq sülhməramlılar yerləşdiriləcək. Bu qüvvələrin tərkibində Türkiyə və Rusiya kimi tərəf və prosesə müdaxilə edən ölkələr yer almayacaq.
Bu xəbər yalnız "Hürriyyət"də yer almayıb, Babacanı Münhen-Bakı-Ankara marşrutunda müşayiət edən köşə yazarı Ərdal Şafak da "Sabah"a təxminən eyni məzmunlu yazı verib.
Azərbaycan, Ermənistan və Türkiyənin Xarici İşlər nazirlikləri təmsilçiləri isə bu xəbərləri təkzib edən açıqlamalar yayıblar.
Hiç yorum yok:
Yorum Gönder