Türkiyə prezidentinə və baş nazirinə ünvanlanan müraciəti imzalayanların sayı 11 min nəfəri keçdi

Türkiyə prezidentinə və baş nazirinə ünvanlanan müraciəti imzalayanların sayı 11 min nəfəri keçdi


C.MƏMMƏDOV


"Türkiyə Ermənistanla yaxınlaşmaq üçün atdığı addım qarşılığında gerçək addım görmür. Futbol diplomatiyası ilə təktərəfli yaxınlaşma belə, erməni yetkililərinin əvvəllər dediklərindən vaz keçməyəcəklərinə dair fikirləri ilə müşayiət olunur. Ermənistan hələ də Türkiyənin torpaq bütövlüyünü tanımır və Ağrıdağdan rəsmən milli rəmz kimi istifadə etməkdədir". Bu barədə Dünya Azərbaycanlıları Konqresinin İdarə Heyətinin üzvü Asif Qurbanovun Türkiyə prezidenti, baş naziri və digər dövlət vəzifəlilərinə Türkiyə - Ermənistan sərhədinin açılması mövzusunda ünvanladığı məktubda bildirilir.
Məktub www.turkiye-ermenistan-karilar-acilmasin.org səhifəsində yerləşdirilib və onu imzalayanların sayı 11 min nəfəri keçib. Kampaniyaya aprelin 4-dən başlanılıb.
"Türkiyə - Ermənistan yaxınlaşması Dağlıq Qarabağ məsələsi səbəbindən Türkiyə - Azərbaycan əlaqələrinə böyük zərər verə bilər. Türkiyə xarici siyasətinin 17 ildir davam edən Dağlıq Qarabağ münaqişəsinin Azərbaycanın xeyrinə həll edilməsini şərt qoyması sadəcə olaraq Azərbaycanın təbii ehtiyatları və Azərbaycan ilə artan ticarət həcmindən asılı deyil. Bir millət - iki dövlət olan Türkiyə və Azərbaycan tarix boyu bir-birlərinə dəstək verib. Əgər qardaşlığı bir tərəfə qoysaq, Türkiyə məlum olan məsələlərdən dolayı bunu edirsə, o zaman Azərbaycandan əldə edilən üstünlüklər daha böyükdür. Enerji ehtiyatlarına malik və Orta Asiyaya açılan qapı olan Azərbaycan Türkiyə üçün daha önəmlidir. Ermənistanın isə Türkiyəyə fayda gətirəcəyi bir amil yoxdur", - deyə məktubda deyilir.
Müraciətdə daha sonra qeyd edilir: "Çanaqqala savaşında Türkiyəyə edilən qızıl, pul və əsgəri yardım Azərbaycanın dəstəyinin göstəriciləridir. Təbii ki, bunun yanında günümüzə qədər Türkiyənin Azərbaycana verdiyi dəstəkləri də bilirik və unutmuruq. Bu günə qədər Türkiyə beynəlxalq platformalarda hər zaman Azərbaycanın yanında yer alıb. Sərhədlərin qondarma "erməni soyqırımı" ABŞ Konqresindən keçməsin deyə açıla biləcəyi deyilir, yazılır, söylənilir. Bu il Azərbaycanı itirən Türkiyə gələn il "qondarma soyqırım"ın tanınmayacağına necə təminat verəcək?!".
Məktubda bildirilir ki, biz Türkiyənin Azərbaycanı Dağlıq Qarabağ məsələsində və digər məsələlərdə yalqız buraxacağına inanmırıq və Türkiyə - Ermənistan sərhədlərini Ermənistanın Dağlıq Qarabağdakı işğalı sona çatana qədər açmamasını istəyirik.