Azərbaycan güzəşt etməyəcək

Ölkə vətəndaşlarının 35,8%-i hesab edir ki, Dağlıq Qarabağ münaqişəsinin nizamlanması prosesində yaxın vaxtlarda irəliləyişlər ola bilər. "Plus-R" sosioloji sorğu xidmətinin keçirdiyi sorğunun nəticələri belədir. Respondentlərin 11,5%-i əmindir ki, münaqişə zonasında hərbi əməliyyatlar başlayacaq, 51,7%-i isə "nə hərb, nə sülh" vəziyyətinin bundan sonra da davam edəcəyini düşünür.
Rəyi soruşulanların 70%-nin fikrincə, münaqişənin nizamlanmasında ermənilərlə kompromis variantı əldə etmək mümkün deyil.
Dağlıq Qarabağ münaqişəsinin dinc yolla nizamlanmasına yönəlmiş danışıqlar prosesində güzəştlər məsələsinə gəldikdə, respondentlərin 6,8%-i qarabağlı ermənilərə mədəni muxtariyyət və yerli özünüidarə səlahiyyətlərinin verilməsini mümkün sayıblar. Sorğu iştirakçılarının 6,2%-i Azərbaycanın tərkibində Dağlıq Qarabağa Naxçıvan Muxtar Respublikasına analoji statusun verilməsini, 0,9%-i isə dünyada ən yüksək muxtariyyətin verilməsini məqbul bilib. Respondentlərin 12,7%-i azərbaycanlı köçkünlərin Dağlıq Qarabağa qayıtmalarından sonra orada statusla bağlı referendumun keçirilməsini gərəkli hesab edirsə, cəmi 0,1% qarabağlı ermənilərə müstəqillik verilə biləcəyini mümkün sayırlar.
Sorğu iştirakçılarının 70%-i Dağlıq Qarabağ məsələsində ermənilərə hər hansı güzəştlər və kompromislərin mümkünsüz olduğuna əmindir.
Nəticələrdən də göründüyü kimi, respondentlərin əksəriyyəti danışıqlarda kompromis və güzəştlər üçün imkan görmürlər. Belə çıxır ki, ATƏT-in Minsk Qrupunun həmsədrləri münaqişə tərəflərinini azərbaycanlılarla erməniləri qarşılıqlı kompromislərə hazırlaşdırmağa çağırmaqda haqlı imişlər.
Azərbaycana dost ölkələrə gəldikdə isə, Türkiyəni respondentlərin 87%-i dost bilirsə, Rusiya ilə bağlı həmin göstərici 15,1% , ABŞ - 4,2%, Gürcüstan - 12,2% Ukrayna - 8,1%, İran isə 5,3%-dir.
Rəyi soruşulanların 94,7%-i Ermənistanı Azərbaycana düşmən ölkə hesab edirsə, 10% İranın, 14,6% - Fransanın, 3,8% isə ABŞ-ın adlarını çəkib.
"Azərbaycanı tərk etmək məcburiyyətində qalsaydınız yaşamaq və işləmək üçün hansı ölkəni seçədiniz?" sualına respondentlərin 9,6%-i "Rusiya" cavabını veribsə, 6,7% Türkiyəni, 5,8% - Almaniyanı, 1,5% - ABŞ-ı, 1,2% - Böyük Britaniyanı, 0,8% - Hollandiyanı, 0,8% da Kanadanı seçib.
Sorğu iştirakçılarının 38,2%-i Avropa Birliyi ilə inteqrasiyaya müsbət münasibət bəsləyirsə, 12,9% - MDB, 7,2% isə İslam Dövlətləri Konfransı Təşkilatı çərçivəsində qarşılıqlı əməkdaşlığın daha da gücləndirilməsinə tərəfdardır.

Humay