AZƏRBAYCAN TÜRKÜ MİRHÜSEYN MUSƏVİ: “PREZİDENT SEÇİLSƏM, XALQA YALAN DANIŞMAYACAĞAM”

Azərbaycan türkü, prezidentliyə namizəd Mirhüseyn Musəvi aprelin 14-də İranın cənubunda yerləşən İlam şəhərində universitet tələbələri ilə görüşüb.

“Media forum” saytının məlumatına görə, hökumətin tələbələrə qarşı mövqeyini tənqid edən Musəvi deyib: “Mütəfəkkir insanlarsız inkişafa nail olmaq mümkün deyil. Məgər tələbə nə istəyir biz ondan qorxuruq? Tələbələr nəyi tənqid etsələr də, ürək ağrısı və xoş niyyətlə edirlər. Biz tələbələrə qarşı baxışımızı dəyişməliyik. Onların bizə inam və etimadı zəifləməyə və məhvə doğru gedir. Biz məhv olmaqda olan bu etimadı bərpa etməliyik”.

Musəvi prezident seçiləcəyi təqdirdə vətəndaşlara qarşı necə münasibət bəsləyəcəyi barədə sualın cavabında deyib: “Mən prezident seçilsəm, xalqa yalan danışmayacaq, onu hökumətin məhrəmi edəcəyəm. Xalqdan heç nə gizlətməyəcəyəm”.

İki gün qabaq Tehranda yaşayan bir qrup azərbaycanlı ilə görüşən

Mirhüseyn Musəvi çıxışının sonunda Azərbaycan dilinə keçərək prezident seçiləcəyi təqdirdə Azərbaycan şəhərlərində yerli əhali ilə Azərbaycan türkcəsində danışacağını deyib: “Dostlardan biri məndən xahiş edib ki, bir az da türk dilində danışım. Mən türkcə danışmağı bacarıram. 12 yaşındaykən Təbrizdən Tehrana gəlmişəm. Əlbəttə, bir az məşq eləməliyəm ki, Azərbaycana gedəndə əhali ilə bu dildə rahat danışa bilim”.

Mərhum Şəhriyarın “Heydərbabaya salam” poemasının gözəlliyinə toxunan Musəvi türk dilini sevdiyini də vurğulayıb: “Hər bir dil özü-özlüyündə canlı bir fenomendir. Bu fenomeni kənardan təzyiq göstərməklə ortadan götürmək və məhv etmək olmaz. Bu dil böyük keçmişə, ədəbiyyata və mədəniyyətə malikdir. Onun hər bir sözü keçmişdəki miflərə işarə edir. Bunu digər dillərdə tapmaq çətin məsələdir. Misal üçün, Şəhriyarın “Heydərbaba” şeirini oxuyanda insan bu dilin incəliyindən agah olur. Elə buna görə də mən bu dilə maraq göstərir, onu sevirəm”.

1941-ci ildə Şərqi Azərbaycan vilayətinin Xaminə şəhərində doğulan M.Musəvi 1969-cu ildə İran Milli Universitetini (hazırkı şəhid Beheşti Universiteti) bitirib. 1981-1989-cu illərdə, İranın hazırkı dini rəhbəri ayətullah Xamneyinin prezidentliyi dövründə baş nazir vəzifəsində işləyib. 1989-cu ildə ölkə konstitusiyasında dəyişiklik edilib və baş nazir postu ləğv olunub.

Hazırda Tehran İncəsənət Akademiyasının rəhbəridir. İngilis və ərəb dillərini mükəmməl bilir.




«Media forum