AKP MEDİASI ƏLİYEVƏ QARŞI “QARA PİAR”A BAŞLADI

Azərbaycan prezidenti İlham Əliyevin Türkiyənin Ermənistanla sərhədlərini açmasına qarşı olduğunu ortaya qoymasından sonra çətin situasiyaya düşən AKP iqtidarı “qara piar”a başlayıb.

Türkiyədən daxil olan məlumatlara görə, AKP hökumətinə və Gülən təriqətinə bağlı qəzetlər, internet saytları və televiziyalarda Azərbaycan hakimiyyətinə, o cümlədən dövlət başçısına qarşı çıxışlar artıb. Bəzən yazılarda hətta təhqirlərə yol verilir və Azərbaycan dövlət başçısı haqqında müxtəlif iddialar ortaya atılır. Bu kampaniyanı aparanlar arasında AKP-yə bağlı medianın köşə yazarları da var. “Zaman”, “Star”, “Yeni Şafak” kimi AKP-yə bağlı çoxtirajlı qəzetlər Azərbaycan iqtıdarını nisbətən yumşaq şəkildə tənqid edir və sərhəd məsələsində Ərdoğan hökumətinin mövqeyi müdafiə olunmağa çalışılır. Ancaq internet saytlarında Azərbaycan iqtıdarı daha sərt formada “vurulur”. AKP yönlü mediada aparılan bu kampaniyada “Ergenekon” məsələsindən də istifadə edilir. Məsələn, belə mənbələrdən birində nə qədər qeyri-ciddi görünsə də, Azərbaycanda sərhədlərin açılmasına qarşı başlayan etiraz dalğası “Ergenekon”un işi hesab olunur.

İddiada deyilir ki, guya Türkiyə hüquq-mühafizə orqanları bu yaxınlarda “Ergenekon”un Azərbaycan ayağını təşkil edən şəxslərin tutulub təhvil verilməsi üçün Bakıya müraciət göndərib. Həmin siyahıda yer alan şəxslərdən bəziləri isə dövlət qurumlarında mühüm vəzifələr tutur. “Nəticədə erməni sərhədlərinin açılmasını bəhanə edən “Ergenekon”çu qruplar Türkiyə əleyhinə kampaniya başladıblar. İddiada deyilir ki, “Ergenekon”a bağlı şəxslər prezident Əliyevin də Türkiyəyə qarşı mövqe tutmasına nail olublar.
Qeyd edək ki, Türkiyədə fətullahçı media ölkədə baş verən və verməyən bütün qaranlıq əməlləri “Ergenekon”a bağlayır və bu zaman məntiqsiz olduğu açıq-aydın görünən və heç bir qaynağa əsaslanmayan məlumatlardan istifadə olunur. Əsas məqsəd AKP-yə qarşı çıxan hər kəsi terrorçu elan etməkdir.
Göründüyü kimi, AKP təbliğatı daha da uzağa gedərək Azərbaycan hakimiyyətini də “Ergenekon”çu elan edib və şantaja keçib. AKP-yə bağlı digər nəşrlərdə isə Azərbaycan hakimiyyəti Rusiyaya sığınmaqda, Kremllə oyuna getməkdə günahlandırır, ölkədə Türkiyənin Ermənistanla sərhədləri açmasına etirazları isə Rusiyaya bağlı qrupların işi hesab edir.




Siyasət şöbəsi