“İran-Ermənistan dəmiryolunun istismarını doğrultmaq üçün onunla qızıl daşımaq lazımdır”

Ermənistanlı iqtisadçı Vaaqn Xaçatryan layihənin həyata keçiriləcəyinə şübhə ilə yanaşdığını vurğulayıb

«Ermənistanla İran arasında dəmiryolu çəkilsə belə, onun iqtisadi effektivliyi sıfıra bərabər olacaq». Ermənistanın "Armtoday" saytının məlumatına görə, bunu Ermənistan Milli Konqresinin nümayəndəsi, iqtisadçı Vaaqn Xaçatryan deyib. O, bu layihənin həyata keçiriləcəyinə belə şübhə ilə yanaşdığını vurğulayıb.

Müxalifət nümayəndəsi qeyd edib ki, bu gün Ermənistanın dəmiryoluna nəzarət edən Rusiya şirkəti belə bu layihədə maraqlı deyil. Onun fikrincə, layihənin iqtisadi səmərəsizliyi bir necə faktorla əlaqədardır. İlk olaraq, yolun Ermənistan hissəsində keçəcəyi ərazinin relyefi çox çətindir. Dəmiryolunun kommersiya tərəfinə gəldikdə isə, Xaçatryan belə deyib: «Təsəvvür etmirəm ki, dəmiryolunun istismarını doğrultmaq üçün dəmiryolu ilə nə daşına bilər. Qızıl və ya daha qiymətli bir şey».
Xatırladaq ki, İranda iki ölkənin nazirləri səviyyəsində İran ilə Ermənistan arasında dəmiryolunun inşası barədə memorandum imzalanıb. Dəmiryolunun uzunluğu 470 km olacaq. İlkin qiymətləndirmələrə görə, layihənin inşası isə bir milyard dollardan baha başa gələcək. /ANS PRESS/