İRƏVANDAKI OLAY TÜRKİYƏ MEDİASINI ŞOKA SALDI

Bu gün qəzetimizdə gedən manşet xəbəri qardaş ölkənin media quruluşlarının diqqətini cəlb edib



“Yeni Müsavat” qəzetinin bügünkü manşeti Türkiyənin siyasi gündəmində rezonans doğurub. Qardaş ölkədə yayın yapan NTV və “Milliyet” kimi nüfuzlu media quruluşları “Azeri basını” deyə qəzetimizə istinad edərək, yaydığımız xəbəri öz manşetlərinə daşıyıblar. Həmin xəbər aprelin 16-da Türkiyənin xarici işlər naziri Əli Babacanın Azərbaycan xarici işlər nazirinin müavini Mahmud Məmmədquliyevə qarşı kobudluq etməsi və ikincinin, gözləmədiyi bu hərəkətdən pərt olması barədə idi. “Milliyet” qəzeti yazdığımız xəbəri olduğu kimi iqtibas edir və rezümedə yazır: “Azərbaycan mətbuatı bu hadisəni düşmən bir ölkədə qardaş bir ölkənin nazirindən gözlənilməsi mümkün olmayan hərəkət kimi şərh edir”.

Qeyd edək ki, bu olayı internet resurslarındakı erməni mənbələrinə istinadən əməkdaşımız qələmə alıb, daha sonra başqa bir əməkdaşımız görüşdə iştirak edən türkiyəli həmkarlarımızla əlaqə saxlayaraq, insidentin həqiqətən də baş verdiyini dəqiqləşdirib.

Bir qədər əvvəl Türkiyənin ən çox tirajlı qəzetlərindən olan "Vatan" da həmin olay barədə qzetimizdə gedən xəbəri təkrarən, "Babacan azeri bürokrata qapıyı göstərdi! ŞOK! ŞOK! ŞOK!" başlığı ilə dərc edib. İrəvan olayı barədə xəbəri "Doğan" xəbər agentliyi bütün Türkiyəyə və dünyaya tirajlayıb.

Dünən çap etməkdə tərərddüdlü olduğumuz xəbərə bu gün qardaş ölkədə bu qədər geniş yer verilməsi sübut edir ki, Əli Babacanın düşünmədən etdiyi hərəkət belə bir həssas məqamda heç yerinə düşməyib. Buna görə onun başı ağrıyacaq.