AKP-çi deputatlar "xəcalət çəkirlər"?!

Türkiyənin hakim partiyası Milli Məclisdəki müzakirələrə qatılmayacaq

Türkiyə-Ermənistan sərhədinin açılacağı haqda yayılan xəbərlərin yaratdığı ajiotaj səngisə də, məsələ hələ də gündəmdədir. Sabah Milli Məclisdə keçiriləcək beynəlxalq konfransın da mövzusu sərhəd məsələsidir.
Qeyd edək ki, sözügedən konfransın keçirilməsi təşəbbüsü ilə parlamentdə təmsil olunan Ana Vətən, Vətəndaş Həmrəyliyi, Bütöv Azərbaycan Xalq Cəbhəsi, Böyük Quruluş və Ədalət partiyalarının rəhbərləri çıxış ediblər. Onlar Ermənistanla Türkiyə arasında yaxınlaşmadan narahat olduqlarını, bu məsələlərə aydınlıq gətirilməsini istədiklərini bildiriblər.
Konfransın təşkilatçılarından biri Fəzail Ağamalı APA-ya bildirib ki, Milli Məclis binasında keçiriləcək konfransa Türkiyənin hakim partiyasının nümayəndələri qatılmayacaqlar. Belə ki, Ədalət və İnkişaf Partiyasının (AKP) konfransda iştirakı nəzərdə tutulan üzvləri toplantıya qatılmaqdan imtina ediblər. F.Ağamalı bu halı təəssüflə qarşıladıqlarını deyib. Türkiyədən gələcək nümayəndə heyətinin üzvləri aşağıdakılardır: Cümhuriyyət Xalq Partiyasından (CHP) Yılmaz Atəş, Şükrü Ələkdağ, Şahin Mengü, Milliyyətçi Hərəkat Partiyasından (MHP) Atilla Kaya və Turan Çirkin.
Konfransa Azərbaycan parlamentdə təmsil olunan digər partiyaların, o cümlədən Yeni Azərbaycan və Müsavat partiyalarının təmsilçiləri də dəvət olunub. Konfransda iştirak edəcək türkiyəli deputatların MM-in sədri Oqtay Əsədov və digər rəsmi şəxslərlə görüşləri də planlaşdırılır.
Türkiyə-Ermənistan sərhədlərinin açılması barədə yayılan məlumatlarla əlaqədar dünən Azərbaycan Həmkarlar İttifaqları Konfederasiyasında (AHİK) da tədbir keçirilib. AHİK-nın sədri Səttar Mehbalıyevin sözlərinə görə, yalnız Qarabağ torpaqları azad edildikdən sonra sərhədin açılmasından danışıla bilər: "Biz Türkiyənin müxtəlif həmkarlar təşkilatlarına müraciət edirik ki, onlar öz hökumətlərinə təsir göstərsinlər və sərhədlərin asılmasına imkan verməsinlər. Biz müəyyən təşkilatlarla danışıqlar da aparmışıq və onlar lazım gəlsə mitinqlər keçirəcəklərini də deyiblər".
S.Mehbalıyev hesab edir ki, bəzi iri dövlətlər - xüsusilə ABŞ və Fransa Türkiyəyə sərhədlərin açılması ilə bağlı təsir göstərir: "Amma Ermənistan təkcə Azərbaycana deyil, Türkiyəyə qarşı da torpaq iddiası ilə çıxış edir, qondarma soyqırım iddiasından əl çəkmir. Ona görə də bu sərhədin açılması separatçı erməni rejiminin güclənməsinə xidmət edəcək".
Sonda həmkarlar ittifaqları Türkiyə həmkarlar ittifaqlarına müraciət ediblər.
Bu arada QAT, KXCP, Müsavat, Ymid, AXCP, AİP, BAXCP, VHP, AVP və BAP-ın Bərdədə fəaliyyət göstərən təşkilatlarının imzaladığı bəyanatda Türkiyə-Ermənistan sərhədlərinin açılmasına etiraz bildirilib. Bəyanatda Türkiyə ilə Ermənistan arasında diplomatik münasibətlərin yaradılması ehtimalına qarşı etiraz ifadə olunub.
BAXCP İdarə Heyətinin ötəngünkü toplantısında da Türkiyə-Ermənistan sərhədlərinin açılması haqda xəbərlər müzakirə olunub. BAXCP İdarə Heyəti belə bir addımın atılacağı təqdirdə Azərbaycan və Türkiyə xalqlarının qardaşlıq münasibətlərinə, Türk birliyinə ciddi ziyan dəyə biləcəyini bəyan edib.
Türkiyədə səfərdə olan deputat, Prezident yanında QHT-lərə Dövlət Dəstəyi Şurasının sədri Azay Quliyev, Azəri-Türk Qadınlar Birliyinin (ATQB) sədri Tənzilə Rüstəmxanlı və Milli QHT Forumunun prezidenti Rauf Zeyni Cümhuriyyət Xalq Partiyasının başqanı Dəniz Baykalla görüşüblər. Daha sonra müxtəlif nüfuzlu media quruluşları və QHT-lərlə bir araya gələn nümayəndə heyəti "Flash TV"-də canlı yayında son günlər iki ölkə arasında yaşanan olaylarla bağlı proqramda iştirak ediblər.

A.CAMAL