«Takvim» qəzeti: «Türkiyə Ermənistan qarşısında dörd şərt irəli sürüb»

Ankara, Ermənistan qoşunlarının Dağlıq Qarabağdan çıxarılması və İrəvanın Türkiyəyə qarşı ərazi iddialdarından əl çəkməsi də var

Türkiyə diplomatik münasibətlərin bərpası üçün Ermənistan qarşısında dörd şərt qoyub. ANS PRESS-in məlumatına görə, Türkiyənin «Takvim» qəzetində bu barədə yazı dərc edilib. Yazıda deyilir ki, rəsmi Ankaranın şərtləri bunlardır: erməni soyqırımı iddialarının araşdırılması üçün birgə komissiyanın yaradılması və «Daşnaksütyun»un arxivi də daxil olmaqla bütün arxivlərin açılması, Ermənistanın 1990-cı ildə qəbul edilmiş müstəqillik aktından Türkiyəyə qarşı ərazi iddialarının çıxarılması, Ermənistan qoşunlarının Dağlıq Qarabağı boşaltması və «Qars müqaviləsi»nin nəticələrinin rəsmi İrəvan tərəfindən tanınması.
Qəzet onu da bildirir ki, Türkiyənin xarici işlər naziri Əli Babacan Ermənistan rəsmiləri ilə danışıqları sadalanan şərtlər çərçivəsində aparır.