İranda türkdilli jurnallar bağlanır

Rəsmi Tehran milli zəmində həbs və təqibləri davam etdirir

"Mart ayında İranda milli zəmində həbs və təqiblər davam edib". Bu cümlə İran Siyasi Məhbuslarının Hüquqlarını Müdafiə Assosiasiyasının hesabatındandır. Dünya Azərbaycanlıları Konqresindən (DAK) "Turan"a daxil olan hesabatda siyasi motivlərlə bağlı həbslər barədə məlumat verilir.
Xəbərdə deyilir ki, bu ilin fevralında həbs edilən Ramin və Mühəmməd Sadıq qardaşları ETTELAAT-ın Ərdəbil bölməsində saxlanılıb, bu qardaşları İran əleyhinə separatizmdə suçlamaq üçün işgəncə yolu ilə ifadə alınmasına cəhd edilib. Məlumata görə, qardaşları ayaqlarından tavana asıblar, yuxusuz və qidasız saxlayıblar, toka veriblər. Xəbərdə bildirilir ki, məhkəmə prosesində Ramin Sadiq istintaq zamanı verdiyi etirafedici ifadələrdən imtina edib və bu ifadələri işgəncə altında verdiyini söyləyib.
Mənbənin məlumatına görə, digər bir təzyiq vasitəsi tələbələrin təhsilə davam etməsini əngəlləməkdir. Hesabatda Emin İmami, Nahid Babazadə, Səməd Paşayi, Nadir Mehdinin magistr kimi təhsillərini davam etdirməsinə rəsmi Tehranın mane olduğu vurğulanır.
Sənəddə İranda türk əsilli toponimlərə qarşı əsl savaş açıldığı qeyd edilir və Güney Azərbaycan milli-hərəkatının liderlərindən Abbas Lisaniyə "Çənlibel" adı daşıyan mağazasının adını dəyişdirmək üçün təzyiq olunduğu deyilir. Mənbə bununla yanaşı, Sulduz şəhərində türk toponimlərinin kütləvi şəkildə dəyişdirildiyini qeyd edir.
Mətbuata təzyiqlərə toxunan hesabatda deyilir ki, bu ilin üç ayı rəzində rəsmi Tehranda türk dilində nəşr edilən "Ulus", "Nəsimi", "Ölük", "Oyanış", "Səttarxan", "Kimlik", "Yoldaş", "Aydın Gələcək", "Qıpçaq", "Yarpaq", "Çənlibel", "Yaşıl yol", "Yurd", "Səhər", "Açıq söz", "Sayan", "Bulud", "Hələc", "İsəlay" kimi jurnallar hər hansı bir səbəb göstərilmədən bağladılıb.