Tehran Mübarəkin başına pul qoydu

İrandakı "İslam İnqilabı Keşikçiləri Korpusu" Misir prezidenti Hüsni Mübarəyi aradan götürməyi planlaşdırır. Bu barədə İsrailin "Ediot Axaranot" qəzeti Misir Təhlükəsizlik Nazirliyindəki mənbələrə istinadən yazıb. "İslam İnqilabı Keşikçiləri Korpusu"nun rəhbərlərindən biri Tehranda Mübarəyi öldürənə milyon dollar mükafat verəcəyini bildirib.
Misir Təhlükəsizlik Nazirliyinin məlumatına görə, pul prezidenti öldürəcək şəxsləri cəlb etmək və onlara təlim keçmək üçün bir qrup iranlıya verilib. Qrup üzvləri onlarla könüllü arasında seçim aparıb. Bir neçə gənc isə təlim keçmək üçün "İslam İnqilabı Keşikçiləri Korpusu"nun düşərgəsinə göndəriliblər.
Kursdan əvvəl İslam Respublikasının banisi Ayətulla Xomeyninin qəbri önündə terrorçu qrupa xüsusi təntənəli mərasim keçirilib. Amma İran bu barədə Misir kəşfiyyatına məlum olduqdan sonra bu ideyadan əl çəkməli olub. Misir təhlükəsizlik qüvvələri iranlıları xəbərdar ediblər ki, sui-qəsd aşkara çıxıb və qatilləri Misirə aparan yol bağlı olacaq.
Eyni zamanda "Hizbullah"ın Misir ərazisində gizli şəbəkəsinin ifşa edilməsi ilə bağlı yaranmış qalmaqal güclənməkdə davam edir. İran "Hizbullah"ın Misir ərazisindəki fəaliyyətində iştirakdan rəsmi olaraq boyun qaçırır. "Hizbullah"ın özü isə sübut etməyə çalışır ki, onun məqsədi yalnız "Həmas"ın Qəzzada silahlanması olub və o, Misirə qarşı heç bir fəaliyyət planlaşdırmırmış.
Misir hakimiyyəti isə bu bəyanatlara inanmır. Misir İnterpoldan "Hizbullah" lideri şeyx Nəsrullanın Livan ərazisini tərk edəcəyi halda onun həbsi üçün beynəlxalq order tələb edib. Misirlilər həmçinin bildiriblər ki, Livan hakimiyyətindən Nəsrulla üzərində məhkəmə və yaxud da Nəsrullanın onlara verilməsini tələb edəcəklər.