TÜRKİYƏ “NABUKKO” ÜÇÜN HƏRƏKƏTƏ KEÇİB

Enerji naziri Hilmi Gülər: “Azərbaycanla bu layihə ilə bağlIı problem yoxdur”



Türkiyənin enerji naziri Hilmi Gülər jurnalistlərə bildirib ki, “Nabukko” qaz kəməri layihəsinə dair bu ilin iyun ayında hökumətlərarası razılaşma imzalana bilər. O, Türkiyə hökumətinin müvafiq razılaşma imzalanması üçün artıq Avropa Birlyi üzvü olan ölkələrə və “Nabukko” iştirakçılarına məktublar göndərdiyini bildirib.

Nazir deyib ki, bu məktublara aprelin sonlarında cavablar alınması gözlənilir. Gülər əlavə edib ki, Türkiyə Qafqaz və orta Asiya qazını Avropa bazarlarına çıxaracaq bu layihədə təşəbbüskar ölkə kimi çıxış edir. Onun sözlərinə görə, məktubda vurğulanıb ki, “Nabukko” layihəsi Avropa İttifaqının maraqlarına uyğundur. Hilmi Gülər Türkiyənin “Nabukko” layihəsi ilə bağlı mövqeyinin dəyişmədiyini də deyib. O qeyd edib ki, Türkiyə əvvəlki kimi kəmərlə nəql olunacaq qazın 15 faizini özünə götürmək istyir: “Biz bu qazı satmaq yox, daxili tələbata yönəltmək istəyirik”, - deyə o bildirib.

Xatırladaq ki, Türkiyənin “Nabukko”dan nəql olunacaq qazın 15 faizini aşağı qiymətlə özünə götürmək istəyi layihənin reallaşması yönündə əsas maneələrdən biridir. Kəmərin əsas təchizatçısı kimi görülən Azərbaycan öz qazını aşağı qiymətlə Türkiyəyə vermək istəmir, eyni zamanda Avropa İttifaqı bu şərti qəbul etmir. Türkiyə həmçinin çalışır ki, “Nabukko” üzərində nəzarəti ələ almaqla təkcə tranzit ölkəsi deyil, həm də Avropa üçün alternativ qaz təminatçısına çevrilsin, eyni zamanda AKP hökuməti kəmərlə bağlı sərfəli olmayan tranzit şərtləri də irəli sürür. “Nabukko” layihəsi qarşısında dayanan çoxsaylı bu kimi əngəllər, üstəlik, AKP hökumətinin Ermənistanla sərhədləri açmağa hazırlaşdığı haqda xəbərlər Azərbaycanın qaz nəqli strategiyasına yenidən baxmasına səbəb olub. Əvvəlcə ARDNŞ Azərbaycan qazını almaq üçün çox sərfəli təklif irəli sürən Rusiyanın “Qazprom” şirkəti ilə anlaşma imzalayıb, daha sonra Qara dənizin dibindən keçməklə Ukraynaya, oradan isə Avropaya çıxmalı olan “Ağ axın” kəməri layihəsinə maraq göstərməyə başlayıb. Lakin Hilmi Gülər hesab edir ki, Azərbaycanla enerji əməkdaşlığında problemlər yarandığı haqda xəbərlər doğru deyil. “Bizim Azərbaycanla münasibətlərimiz yüksək səviyyədə olaraq qalır. Bu yaxınlarda Azərbaycan, İtaliya və Yunanıstandan olan həmkarlarımızla Xəzər qazının Avropa bazarlarına nəqli ilə bağlı diskussiyalar aparmışıq”.