AKP-çi deputat Azərbaycana gəlməmələrinin səbəblərini açıqlayıb

“Baş nazirimiz və prezidentimiz lazımi açıqlamaları veriblər”



“Təəssüf ki, Türkiyənin hakim Ədalət və İnkişaf Partiyasının nümayəndələri Azərbaycan və Türkiyə millət vəkillərinin iştirakı ilə Bakıda keçiriləcək, iki ölkə arasında münasibətlərin vəziyyətinə həsr olunmuş beynəlxalq konfransda iştirak etməyəcək”. APA-nın xəbərinə görə, bunu Mili Məclisin bugünkü iclasında çıxışında millət vəkili, Ana Vətən Partiyasının sədri Fəzail Ağamalı bildirib. Deputat qeyd edib ki, Türkiyənin hakim partiyasının nümayəndələri əvvəlcə toplantıya qatılmağa razılıqlarını bildirsələr də, sonradan Bakıya gəlməyəcəklərini deyiblər.



F. Ağamalı sabah Bakıda keçiriləcək tədbirin MM-də təmsil olunan beş partiyanın təşəbbüsü ilə baş tutacağını söyləyib.



Türkiyə Böyük Millət Məclisinin Türkiyə-Azərbaycan Dostluq Qrupunun sədri, AKP Konya millət vəkili Mustafa Kabakçı isə APA-nın Türkiyə bürosuna açıqlamasında dəvəti qəbul etməmələrinin səbəblərini açıqlayıb: “Mən həmişə Bakıya böyük məmnuniyyətlə getmişəm. Ora vətənimin bir parçasıdır. Ancaq Bakıda keçirilən toplantıya getməyim üçün Azərbaycan parlamentindəki Dostluq Qrupunun sədrindən dəvət almağım lazımdır. Digər tərəfdən, mənsub olduğum AKP-nin səlahiyyətli orqanları mənim Bakıya getməyim üçün qərar qəbul etməlidir. Baş nazirimiz və prezidentimiz lazımi açıqlamaları veriblər. Mən də Məclisdəki çıxışımda Türkiyənin Azərbaycanla bağlı siyasətində heç bir dəyişiklik olmadığını vurğuladım. Türkiyənin Ermənistanla apardığı danışıqların bütün təfərrüatları barədə Azərbaycana məlumat verilib”.



Qeyd edək ki, Türkiyədən Bakıya gələcək nümayəndə heyətinin tərkibi artıq açıqlanıb. Bunlar Cümhuriyyət Xalq Partiyasından (CHP) Yılmaz Atəş, Şükrü Ələkdağ, Şahin Mengü, Milliyyətçi Hərəkat Partiyasından (MHP) Atilla Kaya və Turan Çirkindir. Toplantıya tədbirin təşkilatçısı olan beş partiya ilə yanaşı, parlamentdə təmsil olunan Yeni Azərbaycan və Müsavat partiyalarının da dəvət olunduğu bildirilib.



Konfransın keçirilməsi təşəbbüsü ilə parlamentdə təmsil olunan Ana Vətən, Vətəndaş Həmrəyliyi, Bütöv Azərbaycan Xalq Cəbhəsi, Böyük Quruluş və Ədalət partiyalarının rəhbərləri çıxış edib.