İKİ TÜRK NAZİR İRƏVANDA DALAŞDI

Düşmənin evində rüsvayçı olay
Əli Babacan Mahmud Məmmədquliyevə qarşı kobudluq etdi



Qara dəniz İqtisadi Əməkdaşlıq Təşkilatının İrəvanda keçirilən toplantısı zamanı Azərbaycan-Türkiyə münasibətləri tarixində ən rüsvayçı hadisə baş verib. Erməni mənbələrinin dünən yaydıqları xəbərlərə görə, Türkiyə xarici işlər naziri Əli Babacan ona nəyisə izah etməyə çalışan Azərbaycan xarici işlər nazirinin müavini Mahmud Məmmədquliyevə qarşı kobudluq edib. «Panarama.am» saytının xəbərinə görə, insident haqda Ermənistan XİN-in protokol xidmətindəki mənbə məlumat verib. Bildirilir ki, toplantıdan sonra QİƏT üzvü olan ölkələrin xarici işlər nazirlərini prezident Serj Sərkisyan qəbul edib.
Görüş başa çatdıqdan sonra QİƏT nazirləri Sərkisyanın qəbul otağını tərk ediblər, bu zaman Məmmədquliyev foyedə Türkiyə xarici işlər naziri Əli Babacana yaxınlaşaraq onun qulağına nəsə deməyə başlayıb. Bu vaxt Babacan Sərkisyanla ikitərəfli görüş üçün foyedə gözləyirmiş. Protokol xidmətinin əməkdaşları Babacanla Məmmədquliyevə yaxınlaşaraq onlara ayrılmaq haqda xəbərdarlıq ediblər. Lakin Məmmədquliyev erməni tərəfinin xəbərdarlığına məhəl qoymayıb və Babacanın qulağına nəsə deməkdə davam edib. Bu zaman Babacan Azərbaycan xarici işlər nazirinin müavininə kifayət qədər kobud formada irad bildirib və ona bayıra çıxmaq üçün qapını göstərib. Bu rəftardan çox pərt olan və əsəbiləşən azərbaycanlı nazir müavini isə əsəbi vəziyyətdə ondan aralanıb və bu zaman qapını səhv salıb. Məmmədquliyevin çıxış qapısı əvəzinə tualet otağının qapısını açdığı, bu zaman foyedəkilərin gülüşdüyü bildirilir. Məlumata görə, hətta Babacan da Məmmədquliyevin qapını səhv salmasına gülüb. Ermənistan prezidentinin mühafizə xidmətinin əməkdaşları isə Məmmədquliyevə yaxınlaşaraq ona çıxış qapısını göstəriblər. Əlbəttə ki, bu xəbərləri düşmən ölkənin KİV-i yayıb və o üzdən qərəzli ola bilər.
Qeyd edək ki, Babacanla Məmmədquliyev arasında ikitərəfli görüşün olduğu haqda Türkiyə xarici işlər nazirini müşayiət edən jurnalistlər xəbər veriblər. Bu ayaqüstü söhbət isə çox güman ki, Sərkisyanla ayrıca görüşə hazırlaşan Babacana Azərbaycanın sərhəd məsələsi ilə bağlı narahatlığını çatdırmaq üçün olub. Türkiyə mətbuatında Babacanla Məmmədquliyevin foyedə söhbətləşərkən çəkilmiş fotosu yer alır; lakin sözügedən insident haqda məlumat verilmir. Həmin fotodan azərbaycanlı nazir müavininin əsəbi formada Babacana nəsə izah etmək istədiyi görünür. Bu insidentdə rüsvayçı olan odur ki, Türkiyə xarici işlər naziri ermənilərin qarşısında azərbaycanlı nazir müavininə qarşı bu cür kobudluq edərək ona qapını göstərib. Bu da Türkiyə iqtidarının hansı mövqe içərisində olduğunu bir daha ortaya qoyur.
Hamımıza keçmiş olsun.
P.S. Xəbəri görüşdə iştirak edən türkiyəli jurnalistlərdən biriylə də dəqiqləşdirdik. Xoşagəlməz olayın gerçəkdən də baş verdiyini təsdiqləyən həmkarımız bildirdi ki, onlardan Turkiyə dövləti adindan bu olayı yazmamaq xahiş olunub.
Siyasət şöbəsi