"Sərhəd ümidi" İrəvanda batdı. Nalbandyan Ermənistanla Türkiyə arasında heç bir sənəd imzalanmayacağını söylədi

Qara dəniz İqtisadi Əməkdaşlıq Təşkilatının iclasına yollanan Türkiyə Xarici İşlər naziri jurnalistlərə niyyətləri barəsində açıqlama verib. Nazir ilk olaraq ikitərəfli və çoxtərəfli münasibətlərin yaxşılaşması üçün problemlər spektrinə aydınlıq gətirilməsini, hamının tam səmimi olmasını istəyib.
"Yalnız bu şərtlərə əməl olunarsa, normal perspektivlərdən danışmaq mümkündür. Mən Yerevanda heç bir sənədə imza atmayacam. Belə məsələ gündəmdə də durmur", - deyə Əli Babacan vurğulayıb. Sözünün üstündə durub da. Nə iclasdan əvvəl, nə də sonra heç bir, hətta niyyətlər memorandumu statusunda olan, sənəd imzalanıb. Tədbirardı mətbuat konfransında jurnalistləri üçtərəfli məsələlər maraqlandırdığından, suallara Əli Babacanla yanaşı Azərbaycan xarici işlər nazirinin müavini Mahmud Məmmədquliyev və Ermənistan XİN başçısı Edvard Nalbandyan cavab veriblər.
Mahmud Məmmədquliyev bildirib ki, sərhədlərin açılması iki ölkə arasında olan münasibətlərə dair məsələdir. "Bizim mövqeyimiz qanuni milli maraqlarımızdan doğur. Danışıqlar zamanı onların nəzərə alınacağına inanıram".
Nazir müavini bəyan edib ki, Türkiyə-Ermənistan münasibətlərinin bərpası yalnız Dağlıq Qarabağ münaqişəsinin həlli ilə əlaqələndirilə bilər. O, iki ölkə arasında münasibətlərin Azərbaycan torpaqlarının işğalı ilə bağlı kəsildiyini xatırladıb.
Edvard Nalbandyan isə Dağlıq Qarabağ probleminin Minsk Qrupu çərçivəsində həll olunacağını və bu məsələlərin bir-birinə aidiyyatı olmadığını söyləyib. Onun sözlərinə görə, Türkiyə ilə ürəkaçan, sonucunun yaxşı bitməsinə inanmaq istədiyi danışıqlar gedir.
Bu yöndə Rusiyanın açıqlaması maraqlıdır. "Rusiya Ermənistan-Türkiyə münasibətlərinin bərpası istiqamətində atılan istənilən addımı alqışlayır". APA-nın "RİA Novosti"yə istinadən verdiyi xəbərə görə, bunu Rusiyanın Xarici İşlər naziri Sergey Lavrov deyib. Lavrov bildirib ki, bu məsələ ən əvvəl Ermənistanla Türkiyə arasında ikitərəfli məsələdir: "Biz tərəflər arasında münasibətlərin normallaşmasına yönəlmiş istənilən addımı alqışlayırıq".
Rusiyanın Türkiyədəki səfirliyi isə bəyan edib ki, son zamanlar Rusiyanın Ankara ilə Yerevanın arasında fəal vasitəçi rolunun oynaması haqqında yayılan məlumatlar narahatlıq doğurmaya bilməz. "Bu cür yazılar Rusiyanı tərəfdaş kimi rəsmi Bakının gözündən salmaq məqsədi daşıyır. Sərhədlərin açılması iki ölkənin münasibətləri çərçivəsində həll oluna bilən məsələdir və üçüncü ölkənin bu dialoqa qatılması yolverilməzdir. Rusiyanın məqsədi - bütövlükdə Qafqaz regionunun inkişafıdır".
"Ermənistan-Türkiyə münasibətlərinin bərpası məsələsi yaxın gələcəkdə həllini tapa bilər". Bu sözləri isə Ermənistanın xarici siyasət iarəsinin başçısı Edvard Nalbandyan söyləyib. O, danışıqların davam etdiyini bildirib: "Biz artıq irəliləyiş qeydə almışıq. Yaxın gələcəkdə bu məsələlərin həllinə çox yaxınlaşa bilərik".
Nalbandyan QDİƏT ölkələri xarici işlər nazirlərinin toplantısı çərçivəsində Ermənistanla Türkiyə arasında hər hansı sənədin imzalanmasının planlaşdırılmadığını açıqlayıb. Nazir Türkiyənin Dağlıq Qarabağ münaqişəsinin həllində vasitəçi olmadığını da söyləyib: "Dağlıq Qarabağ münaqişəsinin həlli üzrə danışıqlar ATƏT-in Minsk Qrupu çərçivəsində və onun həmsədrlərinin köməyi ilə aparılır. Başqa format yoxdur".
Xatırladaq ki, ABŞ-ın "The Wall Street Journal" qəzeti aprelin 16-da Türkiyə ilə Ermənistan arasında sənəd imzalanacağını və sərhədlərin açılacağını yazmışdı.

Aqil CAMAL
Hüquq SALMANOV