İSRAİL İRANI VURMAĞA HAZIRLAŞIR

“The Times” qəzeti: “hökumət əmr versə, əməliyyatlar bir neçə saata başlaya bilər”



Britaniyanın “The Times” qəzetinin yazdığına görə, İsrail ordusu İranın nüvə obyektlərinə qarşı irimiqyaslı hava əməliyyatlarına başlamaq üçün hazırlıq görür.

Bildirilir ki, əgər Benyamin Netanyahunun başçılıq etdiyi yeni hökumət əmr versə, İsrail ordusu bir neçə saat ərzində İrana qarşı hava əməliyyatlarına başlaya bilər.
İsrail ordusundan adının açıqlanmasını istəməyən yüksək səlahiyyətli şəxs deyib ki, əgər silahlı qüvvələrə yaşıl işıq yandırılsa, hava zərbələri bir neçə saat ərzində başlayacaq. Mənbə bu məqsədlə bütün hazırlıqların görüldüyünü bildirib. O, deyib ki, İsrail ordusu bununla İrana zərbə endirilə biləcəyi haqda xəbərdarlıqların boş sözlərdən ibarət olmadığını nümayiş etdirmək istəyir.
Qəzetin yazdığına görə, İsrail ordusu İrana qarşı hərbi əməliyyatlar üçün 3 “Avaks” erkən xəbərdarlıq radar təyyarəsi almağa və mülki əhalini mümkün cavab zərbələrindən qorumaq üçün genişmiqyaslı sığınacaq təlimləri keçirməyə hazırlaşır. İsrail ordusunun hədəfində 10-dan çox obyekt var və onların arasında Natanzdakı nüvə obyekti, Araks ağır su zavodu da yer alır. Lakin İsrail prezidenti Şimon Peres iki gün əvvəl demişdi ki, onun ölkəsinin İrana qarşı hərbi əməliyyatlara başlamaq fikri yoxdur və bu haqda mətbuatda yayılan xəbərlər əsassızdır.