Türk Tarix Qurumuna yeni sədr seçildi

Türk Tarix Qurumuna yeni sədr seçildi
Türk Tarix Qurumuna (TTQ) yeni sədr təyin olunub. APA-nın məlumatına görə, bu vəzifəyə Türkiyə Polis Akademiyasının müəllimi, professor Əli Birinci təyin edilib. Ə. Birincinin Fətullah Gülənə yaxın şəxs olduğu bildirilir. O, Qazi Universitetinin Atatürkü təhqir edən müəllimi Atilla Yaylaya dəstək verən, ali məktəblərdə qızların baş örtüyü taxmasının lehinə çıxış edən şəxs kimi də tanınır. Bundan başqa, Ə. Birincinin Türkiyə prezidenti Abdulla Güllə də yaxşı münasibətlərinin olduğu iddia edilir.
Qeyd edək ki, TTQ-nun əvvəlki sədri Yusuf Halaçoğlu bir neçə gün əvvəl tutduğu vəzifədən uzaqlaşdırılıb. Rəsmi olaraq, onun səlahiyyət müddətinin başa çatdığı üçün sədrlikdən uzaqlaşdırıldığı açıqlansa da, Y. Halaçoğlunun Türkiyə ilə Ermənistan arasında əlaqələrin genişləndirilməsinə qarşı çıxdığından vəzifəsindən kənarlaşdırıldığı bildirilir.