Əsgərimiz beş aydır erməni əsirliyindədir

Əsgərimiz beş aydır erməni əsirliyindədir
"QIRMIZI XAÇ" BU MÜDDƏT ƏRZİNDƏ ƏSİRƏ ALTI DƏFƏ BAŞ ÇƏKİB

Azərbaycan Silahlı Qüvvələrinin əsgəri Rafiq Həsənovun erməni tərəfə əsir düşməsindən beş ay ötüb. Əsgərin geri qaytarılması ilə bağlı tərəflər arasında danışıqlar aparılmasına baxmayaraq, hələ müsbət nəticə verməyib. Beynəlxalq Qırmızı Xaç Komitəsinin Azərbaycan nümayəndəliyindən verilən məlumata görə, bu müddət ərzində əsir əsgərə altı dəfə baş çəkilib. Komitənin Ermənistan nümayəndəliyinin əməkdaşları həmin müddət ərzində həmçinin Rafiq Həsənovun saxlanma şəraiti, fiziki durumu ilə bağlı da monitorinqlər keçirib. Komitədən bildiriblər ki, başçəkmələr zamanı Rafiq Həsənovdan ailəsinə, ailəsindən isə əsir əsgərə məktublar çatdırılıb. Hazırda Ermənistanda saxlanılan əsgər Rafiq Həsənovun saxlanma şəraiti nəzarət altındadır.

Əsir əsgərin geri qaytarılması məsələsinə gəlincə isə, komitədən bildiriblər ki, onlar danışıqlar prosesində iştirak etmədiyindən nəticələr barədə məlumatsızdır. Komitə yalnız əsirin qaytarılması prosesində vasitəçiliyi öz üzərinə götürüb.