«ANA FƏRYADI»na YER TAPILMIR

«ANA FƏRYADI»na YER TAPILMIR
2009-01-09 - 18:38:00


Xocalı soyqırımı qurbanlarının xatirəsini əbədiləşdirən «Ana fəryadı» abidəsini qoymaq üçün uyğun yer tapılmayıb. Bunu «Media forum» saytına Xətai Rayon İcra Hakimiyyəti başçısının birinci müavini Zaməddin Əkbərov deyib.

Sözügedən abidə 1993-cü ildən 2008-ci ilin əvvəlinədək Bakının Xətai rayonu ərazisindəki parkda qoyulub. 2008-ci ildə Xocalı faciəsinin ildönümü ərəfəsində yeni abidə ilə əvəz edilib. Hər iki heykəldə əlində öldürülmüş körpəsini tutan ana - birinci heykəldə ananın başı üzərində, ikinci heykəldə isə qolları üstündə - təsvir edilib.

Abidə dəyişdirilərkən əvvəlki heykəlin tez bir zamanda yeni yerdə qoyulacağı bildirilirdi.

Bir ilə yaxındır «Ana fəryadı»nın harda saxlandığı da bəlli deyil. 2009-cu il yanvarın 9-da bunu öyrənmək üçün «abidə haradadır» soruşan «Media forum» əməkdaşına Z.Əkbərov «harda olacaq, bizdə» sözlərindən başqa heç nə deməyib.


«Media forum»