Neftin qiyməti $50-nin üstünə çıxdı

Neftin qiyməti $50-nin üstünə çıxdı
Yanvarın 6-da Nyu-Yorkun NYMEX əmtəə birjasında WTİ neftinin fevral füçerslərinin dəyəri 0,91 dollar (1,86%) artaraq 1 barel üçün $ 50,53 təşkil edib.
İCE London qitələrarası birjasındasa Brent markalı neftin qiyməti 0,23 dollar azalaraq 1 barel/$48,58-ə düşüb.
Maraqlıdır ki, neftin bahalaşması ABŞ-da bir sıra mənfi makroiqtisadi göstəricilərin açıqlanması fonunda baş verib. Belə ki, ABŞ-da emal sənayesində sifarişlərin həcmi 4,6% azalıb və bu, müvafiq proqnozu iki dəfə üstələyib. Bundan əlavə, daşınmaz əmlakın təkrar bazarında başa çatdırılmamış əqdlərin indeksi 4% düşüb ("APA-Economics").
Nəhayət, Federal Ehtiyat Sisteminin hesablamalarına görə, iqtisadi geriləmə ABŞ-da 2009-cu ildə də müşahidə olunacaq, yəni cari ildə YDM-in azalması gözlənilir. Bu amil ABŞ iqtisadiyyatının pisləşməsinin davam etməsini əks etdirərək bazarda neftə olan tələbatı azaltmalıdır, lakin göründüyü kimi, neftin qiyməti yüksəlib. Buna yeganə səbəb Küveyt və Qətər tərəfindən yanvarda dünya bazarına neft tədarükünü azaldacaqları barədə bəyanatlar olub.