ŞAHNAZ QULAMİYƏ 6 AY ŞƏRTİ HƏBS VERİLDİ

ŞAHNAZ QULAMİYƏ 6 AY ŞƏRTİ HƏBS VERİLDİ
2009-01-05 - 17:09:00



Şahnaz Qulami


2008-ci il noyabrın 9-dan Təbriz həbsxanasında saxlanan azərbaycanlı jurnalist və hüquq müdafiəçisi Şahnaz Qulami 6 ay müddətinə şərti azadlıqdan məhrumetmə cəzasına məhkum edilib. «Media forum» saytı xəbər verir ki, qərar Təbriz İnqilab Məhkəməsində çıxarılıb.

Ş.Qulami separatçılıqda, İranın milli təhlükəsizliyinə qarşı çıxmaqda və yalan məlumat yaymaqda təqsirli bilinib. Onun hüquqlarını iki vəkil - Məhəmmədəli Dadxah və Hacər Səbbaqiyan müdafiə edib. M.Dadxah jurnalistlərə açıqlamasında bildirib ki, məhkəmə Ş.Qulamini təqsirli bilərkən onun müxtəlif saytlarda yerləşdirilmiş məqalələrinə və bir neçə aksiyada iştirakına əsaslanıb: «Biz bunları belə ağır ittiham üçün yetərli sübut saymırıq».

Ş.Qulami həbsinə və zindandakı ağır şəraitə etiraz olaraq 2008-ci ilin dekabrında səkkiz gün aclıq aksiyası keçirib. O, siyasi fəaliyyətinə görə 1999-cu ildən 2003-cü ilədək həbsdə olub. 2006-cı ildə «İran» qəzetində azərbaycanlıları təhqir edən karikaturanın dərcinə etiraz olaraq keçirilən aksiyalarda iştirakına görə bir ay həbsdə saxlanıb.




«Media forum»