Tiflis-APA. Gürcüstan tərəfi son iki həftə ərzində keçirilən hərbi əməliyyatlarda 215 nəfər itki verib. APA-nın “İnterfaks”a istinadən yaydığı məlumata görə, bu rəqəmi Gürcüstan parlamentinin müdafiə və dövlət təhlükəsizliyi komitəsinin sədri Qivi Tarqamadze açıqlayıb. Onun sözlərinə görə, hərbi əməliyyatlarda 1,469 nəfər yaralanıb, onlardan 446 nəfəri stasionar müalicədədir.
Gürcüstan Müdafiə Nazirliyinin 13 əməkdaşı ölüb, 200 əməkdaşı isə yaralanıb. Müdafiə Nazirliyinin isə 133 hərbçisi əməliyyatlarda həlak olub, 1199 hərbçi isə müxtəlif dərəcəli xəsarət alıb. İtkin düşən hərbçilərin sayı 70 nəfərdir, həlak olmuş yeddi hərbçinin şəxsiyyəti isə müəyyənləşdirilməyib. Hərbi münaqişədə həlak olanların 69 nəfəri mülki şəxsdir, 61 mülki şəxs isə əməliyyatlarda yaralanıb. Əməliyyat zonasında itkin düşən mülki şəxslərin sayını isə müəyyənləşdirmək mümkün olmayıb.
Rusiya Silahlı Qüvvələri baş qərargah rəisinin müavini Anatoli Noqovitsın gürcü-osetin münaqişə zonasında 74 rus hərbçisinin öldüyünü, 171 hərbçinin isə yaralandığını açıqlayıb. Onun sözlərinə görə, 19 hərbçi itkin düşüb. Rusiya Xarici İşlər Nazirliyi isə gürcülərin Sxinvaliyə hücumu zamanı 2 minə yaxın mülki şəxsin zərər çəkdiyini bildirib.
apa
Hiç yorum yok:
Yorum Gönder