Zəfər Quliyev: «Iran-Israil münasibətləri nəzərə alınarsa, Peresin Bakı səfəri zamanı təxribatın ola biləcəyi istisna edilməməli

Iran Şimon Peresin Bakı səfərinə qarşı

Israil prezidenti Şimon Peresin Azərbaycana rəsmi səfər edəcəyilə bağlı xəbərlər Cənub qonşumuz tərəfindən sərt reaksiya ilə qarşılanıb. Artıq Iran rəsmilərinin dilindən rəsmi Bakının ünvanına tənqidlər səslənir. Iran prezidentinin hərbi və təhlükəsizlik məsələləri üzrə müşaviri “Fələstini işğal etmiş Israilin” dövlət başçısının Bakıya dəvət olunmasını “qonşu müsəlman dövlətlərinə hörmətsizlik” kimi qiymətləndirib.
Rejim rəsmisi iddia edib ki, Azərbaycanın müsəlman əhalisi Şimon Peresin səfərini istəmir və ona etiraz olaraq aksiyalar başlayacaq. Bir sıra ekspertlərin fikrincə, bu bəyanat Tehran rejiminin Bakıda təxribata hazırlaşdığını deməyə əsas verir.
Siyasi şərhçi Zəfər Quliyev hesab edir ki, Israil prezidentinin səfəri zamanı heç şübhəsiz Azərbaycan ciddi təhlükəsizlik tədbirləri görməlidir. Azərbaycanın yerləşdiyi regionun kifayət qədər təhlükəli bölgə olduğunu deyən Z.Quliyev vurğuladı ki, Iranda gedən prosesi və Iran-Israil münasibətləri nəzərə alınarsa hər hansı təxribatın ola biləcəyi istisna edilməməlidir: “Azərbaycan bir dövlət olaraq Iranın bu cür tənqidlərinə fikir verməməlidir. Iran özü müsəlman həmrəyliyi prinsipini dəfələrlə kobudcasına pozaraq, Azərbaycanın maraqlarına zidd hərəkət edib. Iran Azərbaycanın torpaqlarını işğal etmiş Ermənistanla neçə illərdir ki, sıx münasibətlər saxlayır. Iran bu cür siyasətiylə təcrid olunmuş Ermənistanı faktiki olaraq yaşadır. Ona görə də Tehranın Azərbaycanın kimlə dostluq etməsinə, kimlə isə dostluq etməməsinə göstəriş verməsi gülünc görünür. Azərbaycan öz siyasətini davam etdirməlidir. Amma təhlükəsizlik tədbirləri də təbii olaraq unudulmamalıdır”. Xəyal