Ermənilər "Avroviziya-2009"da da Qarabağa iddia etdilər

Ermənistana aid videobaşlıqdan Qarabağdakı heykəlin təsviri çıxarılsa da ermənilər yenə də öz bildiklərini etdilər

“Avroviziya” mahnı müsabiqəsinin təşkilat komitəsi Azərbaycanın tərəfinin müraciətindən sonra Ermənistana aid videobaşlıqdan Qarabağda yerləşən heykəlin təsvirini çıxartdı. Amma bu gecə müsabiqənin final mərhələsində hər bir ölkədə səsvermənin nəticələri elan edilən zaman Ermənistan tərəfi növbəti dəfə öz bildiyini etdi. Ötən il Ermənistanı “Avroviziya”da təmsil edən Surişo balları elan edərkən əlində tutduğu bloknotu iki-üç dəfə qəsdən yuxarı qaldırdı. Bloknotun arxa tərəfində isə videobaşlıqdan çıxarılan həmin heykəl təsvir olunmuşdu.

Xatırladaq ki, Azərbaycanın Xarici İşlər Nazirliyi "Avroviziya-2009" mahnı müsabiqəsinin birinci yarımfinalı zamanı Dağlıq Qarabağdakı abidənin Ermənistanla bağlı videobaşlığa necə salınması məsələsini araşdırdırğını və lazım gələrsə, təşkilata müraciət edəcəyini bildirmişdi. "Armtoday" saytının məlumatına görə isə Azərbaycanın Moskvadakı səfirliyinin məsələ ilə bağlı Rusiyanın Xarici İşlər Nazirliyinə etiraz notasından sonra "Avroviziya-2009" müsabiqəsinin təşkilatçıları Ermənistana aid videobaşlıqdan Qarabağdakı heykəlin təsvirini çıxarıb.

Qeyd edək ki, Moskvada keçirilən "Avroviziya" mahnı müsabiqəsinin mayın 12-də keçirilən birinci yarmfinalında Ermənistanla bağlı videobaşlıqda Ermənistan abidələri içərisində Dağlıq Qarabağdakı abidə də nümayiş etdirilmişdi./ANSPRESS/