QARABAĞ AZADLIQ TƏŞKİLATI TÜRKİYƏ RƏHBƏRLİYİNİ XƏYANƏTDƏ GÜNAHLANDIRDI: «ONLAR ALLAH və TARIX QARŞISINDA CAVAB VERƏCƏKLƏR»

QARABAĞ AZADLIQ TƏŞKİLATI TÜRKİYƏ RƏHBƏRLİYİNİ XƏYANƏTDƏ GÜNAHLANDIRDI: «ONLAR ALLAH və TARIX QARŞISINDA CAVAB VERƏCƏKLƏR»


Qarabağ Azadlıq Təşkilatı bəyanat yayaraq Türkiyə rəhbərliyini Azərbaycana xəyanətdə günahlandırıb. Bəyanatda deyilir: «Türkiyə prezidenti Abdulla Gülün Ermənistana səfər edərək işğalçı ölkənin rəhbəri ilə birlikdə futbol matçını izləmək fikrindən daşınmaması, bu haqda artıq rəsmi məlumatın da yayılması Türkiyə rəhbərliyinin bilərəkdən Azərbaycanın maraqlarına xəyanət etməsindən xəbər verir. Bu xəyanətkar addımın məsuliyyəti Abdulla Güllə yanaşı, baş nazir Rəcəb Teyyub Ərdoğanın və bütövlükdə Türkiyə hakimiyyətinin üzərinə düşür. Türkiyənin tarixində belə rüsvayçı və şərəfsiz qərar olmamışdı».

QAT-ın fikrincə, Gül-Ərdoğan cütlüyünün mövqeyinə heç bir bəhanə ilə bəraət qazandırmaq olmaz: «Bu hərəkət nə Türkiyənin, nə də Azərbaycanın maraqlarına cavab verir və ancaq Ermənistanın, həmçinin bəzi ermənipərəst beynəlxalq güclərin maraqlarını təmin edə bilər. Ona görə də Türkiyə rəhbərliyinin, Gül-Ərdoğan cütlüyünün beynəlxalq erməni lobbisinin təsiri altına düşməsi haqda haqlı olaraq ciddi şübhələr yaranır. Təsadüfi deyil ki, son günlər ərzində nə Gül, nə də Ərdoğan bu səfərin Türkiyə və Azərbaycan üçün hansı əhəmiyyətinin olması haqda ağılabatan heç nə deyə bilməyiblər. Onların bu təşəbbüsünü Azərbaycan və Türkiyə cəmiyyətlərinin böyük əksəriyyəti rədd edib».

Bəyanatda deyilir ki, Gül-Ərdoğan cütlüyünün hərəkəti təkcə Azərbaycan və Türkiyəyə deyil, bütün islam və türk dünyasına qarşı yönəlib. Onlar nə dinə, nə də millətə bağlı adamlarmışlar. Gül və Ərdoğan Azərbaycan və Türkiyə, islam və türk tarixinə rüsvayçı bir ləkə yapdılar. Onlar bu hərəkətlərinə görə Allah və tarix qarşısında cavab verəcəklər. Müqəddəs Ramazan günlərində onlar şəhidlərimizin qanları ilə alver etdilər, şəhidlərimizin axan qanlarını, əsirlikdə olan insanlarımızı, Xocalı qətliamını ermənilərə bağışlamaqla ermənilərdən, dünya birliyindən nə isə almaq istəyinə düşdülər. Allah qəhr etsin! Allah lənət etsin!»

Sentyabrın 6-da Türkiyə prezidenti Abdulla Gül milli futbol yığmasının Yerevanda Ermənistana qarşı keçirəcəyi matçı izləmək üçün qonşu ölkəyə səfər edəcək. Onu Yerevana Ermənistan prezidenti Serj Sərkisyan dəvət edib. Gülün dəvəti qəbul etdiyi bu gün rəsmən açıqlanıb.




«Media forum»