گونئی آذربایجانین یئنی بیرلیک سیمبولونا گئرافیک آچیسیندان بیر باخیش

گونئی آذربایجانین یئنی بیرلیک سیمبولونا گئرافیک آچیسیندان بیر باخیش





مستقیل آذربایجان فعاللاری طرفیندن یئنی بیرلیک سیمبول چاغیریشی، چوخلو مباحثه لره سبب اولوبدور. بو آرادا بیر سیرا دوستلار بو چاغیریشدان حمایت ائده رک، بیر باشقا فیکیرده اورتایا قویوبلار کی یاخشی اولاردی کی آی اولدوزون رنگی «قارا» یئرینه «ساری» سئچیلردی. منده بیر آذربایجانلی اولاراق اوز فیکیرینی اورتایا قویانلارین بیری اولاراق، بعضی دوستلار طرفیندن «تک باشینا بایراق اونری سی وئرمک!» اتهامی ایله تاپدالانمیش اولموشام. من ایندیه جک بایراق مساله سینه هئچ زامان قاریشمامیشدیم آما بو مساله نین چوزوم یولونون تاپیلماسین گوردویوم حالدا، داها بیر قیراخدا دوروب باخماغی دوز گورمه دیم. نئیه کی گوردوم بیر چوخ دوزگون فیکیر اورتایا قویولوبدور یالنیز قارا رنگ سئچیلمه سی بیر سیرا تنقیدلره سبب اولوبدور کی بو تنقیدلر چوخدا یئرسیز دئییل دیر. گئج اولماسین دئیه تئزلیکله بیر یازی یازیب و بو فیکیری اورتایا قویدوم کی قارا یئرینه ساری دا اولابیلر. اگر بیر آز چوخ دوشونسه یدیم بلکی او فیکیری گیزلی امضا ایله اورتایا قویاردیم کی اوزومو رئکلام ائتمک شبهه سی اورتایا چیخمازدی. آما بللی دئییل دیر کی او زامان دا تخریبات چیلار بهانه تاپا بلمزدیلر! باشقا بیر یئرده اوخودوم کی بیریسی یازمیشدی کی ندن چاغیریشی یایان لار آدلارینی یازماییبلار!؟ بو مسئولیت سیزلیکدیر! ایندی بیر فیکیر صاحیبی اولانین تکلیفی ندیر؟ فیکیرینی امضاسی ایله یاییرسا اوزونو رئکلام ائدیر، امضاسیز یاییرسا مسئولیت سیزدیر!؟...



آما بوردا بیر باشقا آچیدان مساله یه باخماق ایسته ییرم کی هر شبهه نی آرادان آپارا بیلر و بلکی بهانه توتانلارین بهانه لرینه سون قویا بیلر. بوردا گوستریله جک کی گئرافیک باخیمیندان بو یئنی فیکیرده هئچ بیر یئنی «اونری» اورتایا قویولماییبدیر و من اوز یانلیش سوزومو کی یئنی اونری تکلیفی کیمی یازمیشدیم گری آلماق ایسته ییرم.



گلین مساله یه بیر داها ان باشلانقیجیندان باخاغین. بوردا بیر سیرا سئوال لاردان باشلاییریق:



1) آیا بیز گونئی آذربایجاندا میللی حاکمیت قورماق ایسته ییریک می یا یوخ؟



اگر هامیمز دئییریک کی ایسته ییریک، گئدیریک ایکینجی سئوالا:



2) آیا هر بیر میللی حاکمیته بایراق لازیمدیرمی یا یوخ؟



اگر هامیمز دئییریک کی لازیمدیر، گئدیریک سونراکی سئوالا:



3) آیا دونیا قانونلاری اساسیندا بیر دولت باشقا دولتین بایراغیندان استفاده ائده بیلرمی یا یوخ؟



اگر هامیمز دئییریک کی استفاده ائده بیلمز، گئدیریک سونراکی سئوالا:



4) آیا ایسته ییریک کی گونئی آذربایجان بایراغی قوزئیین بایراغی ایله آز فرقی اولسون یوخسا چوخ فرقی اولسون؟



اگر هامیمز دئییریک کی آز فرقی اولسون، گئدیریک سونراکی سئوالا:



5) آیا گئرافیک باخیمیندان آی اولدوزون رنگین دئیشمکدن آز فرق بو بایراقدا یاراتماق اولارمی کی هم بایراغین گئرافیک عنصرلاری باخیمیندان ان آز «معنا فرقی» داشیسین و هم «گوروش» باخیمیندان فرقلی نظره گلسین یا یوخ؟



بوردا هر کیمسه کی ادعا ائدیرسه بوندان آز فرق یاراتماق اولار، گرک اوز طرحین اورتایا قویسون یوخسا هاوادا سوز قبول اولونا بیلمز. هر طرحده گرک ایکی اونملی مساله یه دقت اولسون هر یئنی بیر گئرافیک عنصرو کی بایراغا آرتیریلا یا اوندان آزالا، بیر «معنا فرقی» نه سبب اولاجاق مثال اوچون اولدوزن 8 پر یئرینه 5 پر اولماسی، گونئی آذربایجانی تورکیه یه داها یاخین اولماسینا دلالت ائدیر و بوردا گونئی و قوزئی آراسیندا فرق اورتایا چیخیر. هابئله «گوروش» باخمیندان سئچیله بیلن بیر فرق گرکلی دیر. اگر یالنیز اولدوز 8 پر یئرینه 5 پر اولورسا بیر طرفسیز ناظر ایلک باخیشدا بو ایکی بایراغی «گوروش» باخمیندان بیر بیریندن سئچه بیلمز و بو بیر اشکال دیر نئیه کی فرقلی معنا داشیماقدان علاوه، او قدر کی لازمدیر «گوروش» باخمیندان فرقی آیدین دئییل.



ایندی اگر هامیمیز قبول ائدیریک کی بایراغین تمام اصلی رنگلرین و شکیل لرین و قالیبین عینی ساخلاییب و یالنیز آی اولدوزون رنگین دئیشمک ان آز فرق دیر کی یاراتماق اولار، گئدیریک سونونجو سئوالا:



6) سیزجه اگر آی اولدوزون رنگینی دئیشمک ایسته ییرسک، آیا «قارا» و «ساری» رنگلردن باشقا بیر رنگ استفاده اولا بیلرمی؟ آیا باشقا بیر رنگین معناسی اولا بیلرمی؟



اگر هامیمیز بو فیکیرله راضییق کی بو ایکی رنگدن باشقا رنگ سئچیله بیلمز، اوندا بوردا اصلا بیر یئنی بایراق اونرسی معناسی یوخدور بوردا یالنیز بیر سئوال اورتادادیر:



«قارا» می، «ساری» می؟



دئمک ایسته دییم بودور کی بو یئنی فیکیره، اونری آدی قویماق یانلیش دیر و من یانلیشیمی اصلاح ائدیریم و سوزومو گری آلیرام. بوردا یالنیز دئموکراتیک سویه ده بیر سورو و بیر رئفراندوم اورتایا قولوبدور:



سیز بیر گونئی آذربایجانلی اولاراق، آی اولدوزون رنگین قارامی ایسته ییرسینیز، یوخسا ساری؟



ایندی آیا آیدین تبریزی کیمی بیر شخص بو ساده مساله دن اوزونه دوکان آچا بیلرمی کی من گونئی آذربایجانا بایراق تکلیف ائتدیم؟! آیا بوکی آی اولدوزون رنگی آغ یئرینه قارا یا ساری اولسون، گئرافیک باخیمیندان، بیر شاهکارمی دیر کی اونون اوچون کیمسه اوزونو رئکلام ائتمک ایسته سین؟! ان بویوک ایش کی گورولوبدور بودور کی «ویکی پدیا» دان (1) قوزئی آذربایجان بایراغی گوتورولوب و بیلگی سایاردا «پئینت» پروگرامیندا کی بوتون بیلگی سایارلاردا واردیر، آغ یئرینه ساری رنگی قوللانیب دیر! بو ایشی ایندیکی اوشاقلار کی بیرینجی صینیفده مکتبه گئدیرلرده گوره بیلرلر! بو گئرافیک شاهکارینا «نوبل اودولو» وئریلرمی؟...



سوزون سونوجو بودور کی من و باشقا دوستلار طرفیندن هئچ بیر «اونری بایراق» اورتایا قویولماییبدیر. بایراغین تمام گئرافیک عنصرلاری عینی دیر و یالنیز بوردا ساده جه بیر سورو اورتا یا قویولوبدور:



سیزجه «قارا» می، یوخسا «ساری» می؟



من بیر گونئی آذربایجانلی اولاراق، 30 میلیون آراسیندا بیر سسیم وار و من «ساری»- یا سس وئرمیشم. ایندی هر کیمسه بو مساله نین حللین ایسته ییر و داش آتماق ایسته میر، یا گرک یوخاریداکی 6 سئوالا اوردا یازیلان جاوابلاردان باشقا بیر جاواب وئرسین، یا اگر همان جاوابلاری وئریر کی اوردا یازیلیبدیر، بیر گونئی آذربایجانلی اولاراق اوز سسینی بو بیرلیک رئفراندوموندان وئرسین کی:



«قارا» می، «ساری» می؟





(1) : http://en.wikipedia .org/wiki/ Image:Flag_ of_Azerbaijan. svg