İRANIN DİNİ RƏHBƏRİ KÜRDÜSTAN ƏYALƏTİNDƏ BƏYAN EDİB Kİ, VƏHABİ və SƏLƏFİ TERRORÇULARI DÜŞMƏNƏ XİDMƏT EDİR

İRANIN DİNİ RƏHBƏRİ KÜRDÜSTAN ƏYALƏTİNDƏ BƏYAN EDİB Kİ, VƏHABİ və SƏLƏFİ TERRORÇULARI DÜŞMƏNƏ XİDMƏT EDİR

İranın dini rəhbəri ayətullah Əli Xamneyi mayın 12-də ölkənin Kürdüstan əyalətinə səfər edib.

əyalətin mərkəzində - Sənəndəc şəhərində ayrı-ayrı kəndlərdən, şəhərlərdən gəlmiş vətəndaşlar qarşısında çıxış edən dini rəhbər onları şiələrlə sünnilər arasında ixtilaf salmaq istəyənlərə qarşı ayıq-sayıq olmağa çağırıb: “Müxtəlif bəhanələrlə, o cümlədən şiə və sünni bəhanəsi ilə milli birliyə xələl gətirənlər düşmən muzdurlarıdır. İstər şiə olsun, istər sünni. İstər bilərəkdən olsun, istər bilməyərəkdən”.

Ayətullah Xamneyi vəhabi və sələfi qruplarının İraq, Pakistan və Əfqanıstandakı fəaliyyətinə də toxunub: “Həmin ölkələrdə vəhabi və sələfilərin terrorçuluqla məşğul olan adamlarının əksəriyyəti özləri də bilmədən düşmənə muzdurluq edirlər. Necə ki, özü bilmədən sünnilərin müqəddəslərini təhqir edən şiə də düşmənin muzdurudur”.

Ölkədə etnik müxtəlifliyi yüksək dəyərləndirən ayətullah Xamneyi yoxsulluq və işsizliyi aradan qaldırmaq üçün Kürdüstan əyalətinə kapital qoyuluşunu vacib sayıb.

O, ölkə əhalisinin bu ilin iyununda keçiriləcək prezident seçkisinə qatılmasının da vacib olduğunu vurğulayıb: “Vətəndaşların aktiv şəkildə prezident seçkisinə qatılması çox vacib məsələdir. Bu, ölkənin başını uca edir, milli birliyi möhkəmləndirir, tamahkar düşmənin fitnəsini puça çıxarır. Düşmən seçkini pozmaq üçün bir ildir təbliğat aparır, amma onların niyyəti baş tutmayacaq”.mediaforum