Ərdoğanın ideyası məqbul sayılmadı

Ərdoğanın ideyası məqbul sayılmadı
Araz Əzimov:"Ermənistanla əməkdaşlığa yol açan heç bir platformanın həyata keçirilməsi mümkün deyil"

Xəbər verdiyimiz kimi, yanvarın 26-da İstanbulda Türkiyənin baş naziri Rəcəb Tayyip Ərdoğanın irəli sürdüyü Qafqazda Sabitlik və Əməkdaşlıq Platforması (QSƏP) müzakirə edilib. Mətbuata qapalı keçirilən müzakirələrdə Türkiyə, Azərbaycan, Gürcüstan, Ermənistan və Rusiyanın xarici işlər nazirlərinin müavinləri iştirak ediblər.
AzərTAc-ın məlumatına görə, toplantıda çıxış edən Azərbaycanın xarici işlər nazirinin müavini Araz Əzimov rəsmi Bakının QSƏP-ə münasibətini açıqlayıb. Onun sözlərinə görə, Azərbaycan ümumən bu təşəbbüsü dəstəkləyir:"Platformada iştirak edən beş ölkənin regionda təhlükəsizliyin yaranmasında maraqlı olması bu platformanın həyata keçirilməsi, inkişafı üçün vacibdir. Eyni zamanda, bu platforma çərçivəsində aparılacaq müzakirələri faydalı hesab edirik".
Bununla yanaşı, Əzimov bildirib ki, rəsmi Bakı Dağlıq Qarabağ münaqişəsi həll olunmadan Ermənistanla əməkdaşlığa yol açan heç bir platformanın həyata keçirilməsini mümkün saymır.