İranda kütləvi edamlar davam edir

İranda kütləvi edamlar davam edir

26/01/2009

Rəsmi mənbələr tərəfindən təsdiq olunan məlumatlara görə, İran zindanlarında 20 məhkum haqqında verilmiş edam cəzaları icra edilib. Edam qərarları əsasən Tehranın “Evin” eləcə də Yəzd və İsfahan həbsxanalarında həyata keçirilib. Yayılan məlumatlarda o da bildirilir ki, edam olunanlardan 10 nəfəri Tehran “Evin” Həbsxanasında kütləvi olaraq edam edilib. Daha 6 məhkum Yəzd şəhəri həbsxanası, 2 nəfər İsfahan həbsxanasında və daha 1 məhkum isə Kərəc şəhərinin “Qızıl Hasar” həbsxanasında dar ağacından asılmaqla edam ediliblər. İran mətbuatının rəsmi qaynaqlara istinadən yaydığı iddialara görə, edam olunanların hamısı, qətl, silahlı soyğun, qarət, zorlama və narkotik maddələrin qaçaqmalçılığı kimi maddələr üzrə təqsirli bilinən şəxslər olublar. Rəsmi mənbələr edam olunların kimliyi haqqında məlumat verməyib. İnsan haqları təşkilatları isə edam olunanlar arasında, Ərdəlan Naibi və Nasir Mehrani adlı 2 məhkumun olduğunu müəyyənləşdirdiyini bildirirlər.
İnsan haqları təşkilatlarının bildirdiyinə görə, edam olunanlar sayı üzrə İran Çindən sonra dünyada ikinci yeri tutur. Azyaşlıların edamı üzrə isə rəsmi Tehran “Birinciliyini” qoruyub saxlayır.