Müdafiə Nazirliyi: 3 erməni əsgəri öldürülüb, bir neçəsi isə yaralıdır

Müdafiə Nazirliyi: 3 erməni əsgəri öldürülüb, bir neçəsi isə yaralıdır
16:00 27-01-09




“Yanvarın 26-da ermənilərin hücumunun qarşısı alınıb, düşmən üç itki, bir neçə yaralı verərək geri çəkilib”



“Ermənistan Silahlı Qüvvələrinin bölmələri Azərbaycan Ordusunun postlarından birini ələ keçirmək, beləliklə də, öz mövqelərini möhkəmləndirmək məqsədi ilə yanvarın 26-da saat 19.00 radələrində Ağdam rayonunun Cəvahirli kəndi istiqamətindən irəliləməyə başlayıb. Düşmən ilk hərəkətindən nəzarətə götürülüb, onun hər addımı izlənilib. Azərbaycan əsgəri düşməni bir az da yaxına buraxdıqdan sonra atəşə başlayıb”.



Bu sözləri APA-ya açıqlamasında Müdafiə Nazirliyinin mətbuat xidmətinin rəisi, polkovnik-leytenant Eldar Sabiroğlu yanvarın 26-da Ağdam cəbhəsində baş verən atışma ilə bağlı deyib.



E. Sabiroğlunun sözlərinə görə, bir saata yaxın gedən döyüşdə düşmək üç itki, bir neçə yaralı verərək geri çəkilib: “Hazırda düşmənin bir meyiti təmas xəttinin yaxınlığında nəzarət altındadır. Digər meyit və yaralılar isə erməni hərbçiləri tərəfindən aparılıb. Azərbaycan Ordusu heç bir itki verməyib”.