Azərbaycan ictimaiyyətinə ağır itki üz verib. Azərbaycan Milli Hərəkatının fəallarından biri, Qulamrza Əmani 35 yaşında maşın təsadüfü nəticəsində dünyasın dəyişib.
Qulamrza Əmani Təbriz Universitetinin Əkinçilik fakültəsini bitirmişdir. O, öyrənci olan zaman Güney Azərbaycan Öyrənci Hərəkatına qoşulmuş, onun fəaliyyətinin genişlənməsində çox önəmli rol oynamışdır. İranın irqçi rejimi onu tutub, 5 il həbs çəkməyə məcbur etmişdir.
Qulamrza Əmani vəfat edənə kimi İran ETTELAAT idarəsinin nəzarəti altında olmuşdur. Dəfələrlə tutulub, hədələnib, hətta sorğu ...sual üçün Tehranın Evin zindanına aparılmışdı. Amma bunlara baxmayaraq, o, qətiyyətlə məzlum və məğrur millətimizin haqqını daim müdafiə etmişdir. Elə bütün bu səbəblərə görə, Azərbaycanlıların ürəyində özünəməxsus yer tutmuşdur. Amma çox təəssüf, Güney Azərbaycanın bu ağır durumunda elimizin qeyrətli oğlu həyatın itirmişdi. O, bu gün aramızda olmasa da, lakin onun inamı, mübarizə yolu, sevdiyi Vətən bizlə yaşayır.
Əmaninin ruhu qarşısında söz veririk ki, onun yolun davam etdirəcək və bir gün Əmani kimi Vətənsevər övladlarımızın adları TÜRKÜN FƏRƏH NƏĞMƏSİNDƏ oxunacaq!
داریخدیریجی آنلارین ان قاباریق فورماسی
سید حیدر بیات
ایلک دؤنه زنگاندا گؤروشدوک. غلامریضا بئش آددیم اویانلاق باخیب گولومسه‌دی. بیلمیرم نییه بیربیریمیزه یاخینلاشیب گؤروشمه‌دیک. یئنه نئچه ساعات سونرا باخیب گولومسه‌دی. نییه یاخینلاشیب گؤروشمه‌دیک؟
تانیمیردیم اونو. قوما قاییتدیق‌دا سیته‌لره باخیب بیلدیم او اوایمیش، امانی. آخی سیته‌لرده کی شکیلی ساققاللی اورا دا ایسه... .
سون گؤروشوموز ستارخاندا اولدو. سلاملاشیب گولومسه‌دیک.
سونرا زهر کیمی آجی خبر...
اونو سئومه‌مک اولمازدی. نئچه ساعات‌دیر ائله بو جور گیجل‌له‌نیرم. جومانین داریخدیریجی آنلاری‌نین ان قاباریق فورماسینی یاشاییرام. نئچه واخت‌دیر یازمیرام، یازیرام یایینلاماییرام. امانی‌یا دا سوسوم مو؟ و سوسورام. سونرا سعید موغانلی‌یا فیکیرلشیرم. بولود دویغولو سعید بو خبری ائشیدیب می؟ ائشیتسه نه ائده‌جک؟ بیلیرم او امانی‌نی او قدر سئوه‌ردی کی.
خبری نئجه ائشیده‌جک؟ نه ائده‌جک؟ حتمن ائشیتسه یازماغی گله‌جک. کاغیذمی تاپاجاق؟
بئله بئله سورغولار راحاتسیز ائدیر بیله‌می. اولسون موغانلی یازا بیلمه‌سه من اونون یئرینه بیر جیزما قارالار یازارام.
آما بیلمیرم بو نیسگیل‌لی آن‌لاردا وادی رحمت‌ده کیم باغیراجاق اونون یئرینه؟
و کیم «اووووی قارداش اوووی اوخویاجاق» دمیرداش‌آسلان اییدیمیزین یاسیندا؟ خاطیرلاییرمیسیز فرزانه اؤلنده آخی «اووووی دده‌م اووووی» اوخودو صرافی.
خبری لسانی‌یه کیم یئتیره‌جک؟ متین‌پور تبریزه گئده بیله‌جک می؟
*
یول اوزون
یول اوزونو
چوخوموز اؤلوروک
سونوجو کیم گؤره‌جک؟
نئچه‌نجی آغی‌یا کیمی یازمالی‌ییق؟
هانسی آغی‌دا بیته‌جک بو دفتر؟
کیم کیمین یئرینه اوووی دئیه‌جک، کیم کیمه، کیم کیمین یئرینه بیر داها متین یازاجاق، یاس ساخلایاجاق؟
هاچان سؤنه‌جک‌لر بو آغی شام‌لاری؟
آه!
جوما
جومانین
جومانین
داریخدیریجی آخشام‌لاری
آغی شام‌لاری
گونش-ین یامان آن‌لاری.
azadtribun
Hiç yorum yok:
Yorum Gönder