DƏLƏDƏN SONRA GÖYƏRÇİN

DƏLƏDƏN SONRA GÖYƏRÇİN


Tehran indi də "casus" heyvanları "ifşa edir"



S.SOLTAN


"Kölgəsindən qorxan" atalar sözünün kimə şamil edildiyi barədə uzun-uzadı yazmaq istəməzdik. Bunun özünə arxayın olmayanlara aid olduğu da sirr deyil. Hakimiyyətlərə də insan xarakterinin bir çox cəhətləri məxsusdur. Mədəni və oxumuş insanlar arasında diktatorlara, demək olar, az rast gəlinir. Bu özünü mürtəcelikdə də göstərir.
Əslində, Tehran hakimiyyəti belələrinə ən aşkar örnəkdir. İran cəmiyyəti və oradakı rejimlərin "hər şeydə ingilis barmağı" axtarmaq adəti var. "BBC deyən düzdür" fikri də bu cəmiyyətin qənaətidir.
Bu azmış kimi, İslam Respublikası indi də heyvanlardan şübhələnməyə başlayıb. Ötənlərdə Tehran "casus dələ"lərdən şübhələnməyə başladı. Keçən il rəsmi dövlət agentliyi İRNA 14 belə gəmiricinin casus aparatı ilə tutulduğu haqda məlumat yaymışdı. Onda hakimiyyət əks-kəşfiyyat qurumlarının ayıq-sayıqlığı barədə danışaraq "aparılmış əməliyyat nəticəsində düşmənin niyyətinin baş tutmadığı"nı bəyan etdi.
Müxalifət sayılan Milli Etimad Partiyasının "Etimadi-milli" qəzetinin 20 oktyabr tarixli sayında bildirilib ki, Nətənzdəki nüvə obyekti yaxınlığında təhlükəsizlik qüvvələri tərəfindən iki "casus göyərçin" tutulub. Mənbənin məlumatına görə, daha bir belə "casus" İsfahan əyalətinin Kaşan rayonu yaxınlığında, ağır su istehsal edən zavodun ətrafında "həbs edilib".
Xəbərdə deyilir ki, tutulan quşların ayaqlarında elektron cihaz quraşdırılmış üzüklər aşkarlanıb.
"Etimadi-milli"nin yazdığına görə, saxlanılmış göyərçinlərdən biri qara, pəncəsindəki üzük isə göy rəngdə olub.
"Casus göyərçinlər" barəsində müxalifət qəzeti əlavə məlumat yaymayıb. Bununla belə dünyanın bir çox informasiya mənbələri, o cümlədən "Frans press", İngiltərədə çıxan "Deyli teleqraf", ABŞ-ın "FOX Nyus" telekanalı, İsrailin "Ynet" agentliyi və s. xəbəri yayıb. "Göyərçinlər"in tutulması barədə "Fars" agentliyi də xəbər verib. Ölkə rəsmiləri bu olayla bağlı hələlik açıqlama verməyiblər. Ancaq müşahidəçilərin fikrincə, İsfahanda "Göyərçin qülləsi" var və bura on minlərlə göyərçin qonur... ayna