Ermənistan gələn il dövlət büdcəsindən müdafiə xərclərinə 495,3 mln. ABŞ dolları həcmində vəsait ayırmağı planlaşdırır

Ermənistan gələn il dövlət büdcəsindən müdafiə xərclərinə 495,3 mln. ABŞ dolları həcmində vəsait ayırmağı planlaşdırır


Bakı. Rəşad Süleymanov - APA. Ermənistan gələn il dövlət büdcəsindən müdafiə xərclərinə 495,3 mln. ABŞ dolları (149,6 mlrd. dram) vəsait ayırmağı planlaşdırır. APA-nın Ermənistan KİV-lərinə istinadən verdiyi məlumata görə, bu, rəsmi İrəvanın 2008-ci ildə müdafiə sektoruna yönəltdiyi vəsaitdən 34% çoxdur. Hərbi xərclər Ermənistanın 2009-cu il üçün dövlət büdcəsində xərclərin 15,7%-ni, ümumi daxili məhsulun isə 3,6%-ni təşkil edəcək.

Qeyd edək ki, rəsmi İrəvan 2008-ci ildə müdafiə xərclərinə 370 mln. dollar, 2007-ci ildə isə 273 mln. dollar vəsait yönəldib. Ermənistanın 2009-cu il dövlət büdcəsinin gəlirləri 2,9 mlrd. dollar, xərcləri isə 3,1 mlrd. dollar proqnozlaşdırılır.

Müqayisə üçün bildirək ki, 2009-cu ildə Azərbaycanın müdafiə xərcləri 1 mlrd. 205 mln. 520 min manat (təxminən 1 mlrd. 500 mln. dollar) proqnozlaşdırılır. apa