Qafqazda gərginlik son həddə çatır
Rusiyanın Cənubi Osetiya və Abxaziyanın “müstəqillik”lərini tanımasına dünya ölkələri tənqidi reaksiya göstərməkdə davam edirlər. Gürcüstanın ərazi bütövlüyünü şübhə altına alan bu qərara dünya dövlətləri və beynəlxalq təşkilatlar sərt bəyanatlarla cavab verirlər.
Rusiyanı məsuliyyətsizlikdə günahlandıran ABŞ Prezidenti Corc Buş: “Bu məsuliyyətsiz qərara yenidən baxılmalıdır”, - deyib. NATO bəyanat yayaraq, Rusiyadan qərarını dəyişməyi tələb edib: “Rusiyanın hərəkətləri bu ölkənin Qafqazda sülh və stabillik niyyətlərini şübhə altına qoyur”. Türkiyə Prezidenti Abdullah Gül Gürcüstanın ərazi bütövlüyünü tanıdıqlarını, Rusiyanın tələsik qərar verdiyini söyləyib. Rus lider Dmitri Medvedev isə iradlara göz yumaraq: “Soyuq müharibə” də daxil olmaqla, kimsədən qorxmuruq, hər kəsə adekvat cavab verəcəyik”,- deyib.
”Rusiyanın Cənubi Osetiya və Abxaziyanın müstəqilliyini tanıması Azərbaycanın ərazi bütövlüyünə hörmətlə yanaşılmasına heç bir təsir göstərməyəcək”. Bu bəyanatla Rusiyanın Azərbaycandakı səfiri Vasili İstratov çıxış edib.
Onun sözlərinə görə, Rusiya Azərbaycanın ərazi bütövlüyünü tanıyır: “Rusiyanın Azərbaycanın ərazi bütövlüyünü tanıması ilə bağlı əvvəllər bəyan etdiyi mövqeyində heç bir dəyişiklik yoxdur. Cənubi Osetiya və Abxaziyanın müstəqilliyinin tanınması çətin, məcburi, lakin indiki situasiyada yeganə mümkün qərardır. Bu qərar Gürcüstan hakimiyyət orqanlarının avqustun 8-də Cənubi Osetiyaya qarşı başladığı hərbi əməliyyatla bağlı konkret situasiyanun məhsuludur. Prezidentlər Dmitri Medvedevlə İlham Əliyev arasında iyulda imzalanmış bəyannamə heç bir halda qüvvəsini itirməyəcək”.
Hiç yorum yok:
Yorum Gönder