İRAN PARLAMENTİ DAXİLİ İŞLƏR NAZİRİNİN DİNDİRİLMƏSİNƏ SƏS VERDİ. PREZİDENT DƏ PARLAMENTƏ GƏLƏCƏK

İRAN PARLAMENTİ DAXİLİ İŞLƏR NAZİRİNİN DİNDİRİLMƏSİNƏ SƏS VERDİ. PREZİDENT DƏ PARLAMENTƏ GƏLƏCƏK


Oktyabrın 27-də İran parlamenti fəxri doktorluq dərəcəsi saxta çıxmış daxili işlər naziri Əli Kürdanın qanunverici orqanda dindirilməsinə səs verib. «Media forum» saytının məlumatına görə, parlamentarlar Ə.Kürdana birgə məktubla müraciət etmək qərarına da gəliblər. Məktubda nazirin könüllü istefa verməsi tələb olunacaq.

Parlamentdəki səsvermədən bir gün əvvəl, oktyabrın 26-da İran prezidenti Mahmud Əhmədinejad ölkə ostandarları ilə görüşündə Ə.Kürdanı müdafiə etdini vurğulayıb: «Kimisə dindirmək deputatların təbii haqqıdır. Lakin mən dindirilmə günü parlamentə gedib daxili işlər nazirini müdafiə edəcəm. Mənimçün insanların ali təhsil ocaqlarından aldığı sənəd yox, onların xidmət əhval-ruhiyyəsinə malik olub-olmaması daha çox əhəmiyyət daşıyır».

Ə.Kürdanın fəxri doktorluq dərəcəsinin saxta olduğu haqda ilk xəbəri bir xeyli əvvəl İran hakimiyyətinə yaxın saytlardan biri yaymışdı. Bundan sonra saytın fəaliyyəti dayandırılsa da, məsələyə ciddi yanaşan İran parlamentinin deputatları Ə.Kürdanı dəfələrlə parlamentə çağıraraq sorğu-suala tutmuş, ondan fəxri doktorluq dərəcəsini hardan aldığı haqda izahat istəmişdilər. Get-gedə qızışan mübahisələrin ardınca İran parlamentinin təlim və tədqiqat komissiyasının sədri Əli Abbaspur jurnalistlərə açıqlamasında Ə.Kürdanın doktorluq dərəcəsinin olmadığını vurğulamışdı. Kürdan fəxri doktorluq dərəcəsini Oksford Universitetindən aldığını bildirmiş, ancaq az sonra bu təhsil ocağı onun dediklərini təkzib etmişdi.





«Media forum»