Son günlər ərəb və dünya mediasında bu ölkə haqda qeyri-adi xəbərlər yayılır
Artıq neçə gündür dünya mediası İran mətbuatına istinadən ölkə prezidenti Mahmud Əhmədinejadın xəstələnməsi ilə bağlı xəbər yayır. İran prezidentinin son bir həftədə telekanallarda görünməməsi yayılan məlumatın həqiqətə yaxın olması ehtimalını artırırdı. O cümlədən hökumətə yaxın mənbələr prezidentin sadəcə yorğun olduğunu, ancaq işini davam etdirdiyini qeyd edirlər. Ancaq bir sıra mənbələr Əhmədinejadın xəstəliyinin ciddi olduğunu, hətta növbəti seçkilərdə iştirak etməyəcəyini bildirirlər.
Ötən gün isə Əhmədinejadın İtaliyada olarkən zəhərlənməsi ilə bağlı məlumatlar yayılıb. Bildirilir ki, Əhmədinejad Romada olarkən onu yüksək dozalı radiasiya ilə zəhərləyiblər. Qeyd edək ki, İran prezidenti özü də təxminən bir ay əvvəl çıxışların birində düşmənlərin onu Romada öldürmək istədiklərini bildirmişdi.
Amma bütün yayılan informasiyalara ötən gün Əhmədinejad özü reaksiya verib. Pakistanın Tehrandakı səfirini qəbul edən Əhmədinejad İran dövlət televiziyasına açıqlama verərək xəstələnməsi ilə bağlı məlumatların həqiqətəuyğun olmadığını bildirib. Sadəcə, bir qədər yorulduğunu qeyd edən İran prezidenti səhhətində ciddi problemlərin olmadığını deyib.
Qeyd edək ki, təxminən bir həftə öncə Livan İslam müqaviməti hərəkatı “Hizbullah”ın lideri Seyyid Həsən Nəsrullaha da zəhər verilməsi ilə bağlı xəbərlər yayılmışdı. İnternet saytlarının birində yayılan məlumatda qeyd olunurdu ki, xarici ölkələrdən birinin kəşfiyyat xidməti tərəfindən zəhərlənən “Hizbullah” lideri üçün İrandan xüsusi təyyarədə həkim qrupu gətirilib. Az sonra isə Nəsrullah həkim qrupunun nəzarəti altında Tehrana aparılıb və müalicəsi orada davam etdirilir.
Uzun zamandır İsrail və Amerika kəşfiyyatının axtardığı “Hizbullah” liderinin zəhərlənməsi xəbəri ciddi rezonans doğursa da, az sonra o özü xəbəri təkzib etməyə vadar olmuşdu. “Hizbullah”a məxsus “əl-Mənar” telekanalına müsahibə verən Seyyid Nəsrullah bu məlumatın provokasiya olduğunu qeyd edib.
Maraqlıdır ki, son günlər ərəb mediasında İrana yönəlik yazıların sayı artıb. Misirin “Ros əl Yusif”, “əl-Cümhuriyyə”, “əl-Düstur” və Səudiyyə Ərəbistanına bağlı “əl-Şərq əl Ovsat” qəzetlərində İrana qarşı ittiham dolu yazılar dərc olunub. Yazılarda İranın regionda rolunun artması və bu ölkənin həm İraqda, həm Fələstində, həm də Livanda baş verənlərə müdaxilə etməsi pislənilib. Hətta misirli yazarlardan biri İranın bölgə üçün İsraildən daha artıq təhlükəli olması kimi iddia ortaya atıb.
Qeyd etmək lazımdır ki, həm bu, həm də digər yazılar məhz üç ölkədə - Misir, Səudiyyə Ərəbistanı və Küveytdə dərc olunan qəzetlərdə yer alması və sırf millətçilik (yazılarda farsların ərəb ölkələrində nüfuzlarını yayması açıq şəkildə qeyd olunur) çalarlarının qabardılması diqqəti çəkir. Məhz bu amil ittiham olunan tərəfin, o cümlədən İranla əməkdaşlıqda günahlandırılan Fələstindəki “İslami Cihad”, “Həmas”, Livanda yerləşən “Hizbullah” və eləcə də İraqda mövcud olan hərəkatların ciddi reaksiyasına səbəb olub. Bir sıra nüfuzlu ərəb din alimləri isə bu kampaniyanın bölgədə məzhəb qarşıdurmasının yaranmasına hesablandığı haqda xəbərdarlıq edirlər.
KƏNAN
musavat
Hiç yorum yok:
Yorum Gönder