«AZADLIQ» və BBC NUŞİRƏVAN MƏHƏRRƏMLİNİN AÇIQLAMASINA MÜNASİBƏT BİLDİRDİ

«AZADLIQ» və BBC NUŞİRƏVAN MƏHƏRRƏMLİNİN AÇIQLAMASINA MÜNASİBƏT BİLDİRDİ
2008-10-31 - 20:14:00


«Azadlıq» radiosu və BBC - Britaniya Yayım Korporasiyası Azərbaycan Milli Televiziya və Radio Şurasının sədri Nuşirəvan Məhərrəmlinin ilin sonuna qədər xarici radiostansiyaların Azərbaycanda milli tezlikdə yayımının dayandırılacağı haqda açıqlamasına münasibət bildiriblər.

«Azadlıq» radiosunun məsələ ilə bağlı saytında yerləşdirdiyi açıqlamasında bildirilir ki, onlar situasiyadan xəbərdardırlar və məsələni ciddiyyətlə nəzərdən keçirirlər: «Biz hələ də məlumatı qiymətləndiririk və necə cavab verəcəyimizlə bağlı qərar qəbul etmək üzrəyik. Biz inanırıq ki, «Azadlıq» radiosu Azərbaycan xalqına professional və senzuraya uğramamış xəbərlər çatdırılmasında önəmli rol oynayır və biz bu işi bundan sonra da davam etdirməkdə əzmliyik».

BBC-nin açıqlamasında isə deyilir: «Bu yaxınlarda BBC Azərbaycan hökuməti ilə danışıqlar aparıb və üç retranslyasiya FM stansiyasının tikintisi haqda müqavilə imzalayıb. Bu stansiyalar BBC-nin Azərbaycanda FM 103.3 dalğasında, həmçinin orta və qısa dalğalarda yayımını gücləndirəcək».

«Turan» agentliyinin məlumatına görə, BBC-nin açıqlamasında daha sonra vurğulanır ki, bu şirkətin bütün tərəfdaşları ilə yaxşı münasibətləri var: «Biz Azərbaycanda dinləyiciləri rəsmi, qərəzsiz və müstəqil informasiya ilə təmin etmək niyyətindəyik. Xüsusən beynəlxalq xəbərlərə tələbat artdığı vaxtda BBC hadisələrin inkişafını izləyəcək».

Azərbaycanda üç xarici radiostansiya yayımlanır - «Amerikanın səsi», «Azadlıq» və BBC.

Milli Teleradio Şurasının sədri N.Məhərrəmli bu gün «Media forum»a deyib ki, Azərbaycanda fəaliyyət göstərən xarici radiostansiyaların sərbəst yayımı 2009-cu ildən dayandırılacaq, onlara verilmiş tezliklər geri alınacaq, nəticədə xarici televiziya və radiolar Azərbaycana yalnız peyk, kabel və internet şəbəkələri vasitəsilə yayımlana biləcək. N.Məhərrəmlinin sözlərinə görə, şura təxminən bir ay sonra xarici yayımların milli tezliklərlə yayımlanmasına qadağa qoyan qərar qəbul edəcək və xarici radiostansiyalara məxsus milli tezlikləri müsabiqəyə çıxaracaq.

«Media forum»