ERMƏNİSTANIN XARİCİ İŞLƏR NAZİRİ AZƏRBAYCANLI JURNALİSTƏ QARABAĞ DANIŞIQLARIN DETALLARINI AÇIQLAYIB

ERMƏNİSTANIN XARİCİ İŞLƏR NAZİRİ AZƏRBAYCANLI JURNALİSTƏ QARABAĞ DANIŞIQLARIN DETALLARINI AÇIQLAYIB


Böyük Britaniya səfərinə çıxmış Ermənistanın xarici işlər naziri Edvard Nalbandyan Londonda «Bi-Bi-Si» radiosunun Azərbaycan xidmətinə müsahibə verib. Sülh danışıqlarından bəhs edən nazir Dağlıq Qarabağ münaqişəsinin həllində bir-iki razılaşdırılmamış məsələnin qaldığını vurğulayıb.


- Biz indi hər iki prezidentin Sankt-Peterburqda təsdiqlədiyi mərhələdəyik. Ermənistan və Azərbaycan prezidentləri danışıqları Minsk qrupu həmsədrlərinin 2007-ci ilin noyabrında təklif etdiyi Madrid prinsipləri əsasında aparmaq əzmini təsdiqləyiblər.

- İndi bu prosesdə hansı məsələlər daha çoxdur - həll edilmiş, yoxsa həll edilməmiş məsələlər?

- Siyasi iradə olsa, onda həll edilmiş məsələlər həll edilməmiş məsələlərdən çoxdur. Siyasi iradə olmasa, onda hətta həll edilmiş məsələlər də həll edilməmiş məsələ bucağından qəbul edilə bilər. Ermənistan məsələyə nikbinliklə baxır və Dağlıq Qarabağ münaqişəsinin dinc, diplomatik və siyasi yollarla nizamlanması məqsədilə danışıqları davam etdirmək əzmindədir.

- O siyasi iradə nəyə söykənməli və hansı həll variantına yönəlməlidir?

- Minsk qrupunun təkliflərinə söykənməlidir. Bu təkliflər öz-özünə yaranmayıb. Bunun üçün uzun illər danışıqlar aparılıb. Azərbaycan və Ermənistan xarici işlər nazirlərinə təqdim edilən təkliflər belə ortaya çıxıb. Bu danışıqların əsasını Helsinki Yekun Aktının üç prinsipi təşkil edir - bu, zor işlədilməməsi və zor işlədilməsi barədə təhdidlərin edilməməsi, ərazi bütövlüyü və öz müqəddəratını təyinetmə hüququdur. Danışıqlar bu üç prinsip əsasında aparılır.

- Tərəflər bu prinsiplər üzərində danışıqlar aparmağa razıdırlarmı, bu prinsipləri qəbul edirlərmi?

- Ermənistanın xarici işlər naziri deyirsə bu üç prinsip var, deməli, Ermənistan bununla razıdır. Azərbaycan deyirsə yalnız ərazi bütövlüyü prinsipi var, onda bu artıq onun cavabdehliyinə qalır, nəyi onlar qəbul edirlər, nəyi isə yox.

- İndi mətbuatda danışıqlar masasında hansısa planın olduğu deyilir. Guya bu plan Azərbaycanın işğal altında olan 7 rayonunun qaytarılması və qaçqınların öz yerlərinə dönməsini, Laçın dəhlizinin eninin və Dağlıq Qarabağın statusunun müəyyənşdirilməsini nəzərdə tutur.

- Siz statusu sonda qeyd etdiniz, amma o bu münaqişənin prinsipial məsələlərindən və ilkin səbəblərindən biridir. Dağlıq Qarabağın statusu məsələsi həll ediləndə bütün qalan məslələrin həlli də asanlaşar.

- Status məsləsində tərəfər hansı mövqedədirlər?

- Mənə elə gəlir ki, mövqelər kifayət qədər yaxınlaşıb. Daha bir addımın atılması qalıb. Elə məhz bu da mən dediyim siyasi iradədən asılıdır.

- Siz referendumu nəzərdə tutursunuz?

- Mən danışıqların məxfiliyini açmaq istəmirəm, Minsk qrupunun təklif etdiyi prinsiplər də məxfidir. Amma mətbuata uzun müddətdir məlumat sızır ki, söhbət referendumdan gedir. Bu referendumda status məsələsi Dağlıq Qarabağ xalqının iradəsinin azad ifadəsi yolu ilə həll edilməlidir.

- Cənab nazir, siz bunu təsdiq edirsiniz, yoxsa bunun sadəcə mətbuatda yazıldığına istinad edirsiniz?

- Mən mətbuatda dərc edilənləri, mətbuata sızanları deyirəm. Amma hər halda bunu xarici işlər naziri deyir.

- Siz Dağlıq Qarabağ xalqının iradəsindən danışanda, təkcə erməni əhalisini nəzərdə tutursunuz, yoxsa bu bölgənin azərbaycanlı əhalisini də?

- Dağlıq Qarabağ xalqı deyəndə orada bundan əvvəl yaşayanlar da, indi yaşayanlar da nəzərdə tutulur. Hər şey çox sadədir - 1988-ci ilə qədər orada əhalinin siyahıyaalınmasının nəticələri bəllidir. Bu nəticələr Dağlıq Qarabağın azərbaycanlı və erməni əhalisinin faiz tərkibinə dair müəyyən rəqəmlər verir. Həmin nisbət də nəzərə alınmalıdır.

- Yəni referendumun nəticələri də məhz bu nisbət əsasında çıxarılacaq? Tərəflər buna razıdırmı?

- Siz artıq məndən təfərrüatları dartıb-çıxarmaq istəyirsiniz... Mən qalan detalları açıqlaya bilmərəm, amma məsələnin məğzini mən artıq dedim. İndi siz özünüz qalanını, nəyin necə olacağını tapın.mediaforum