“Bu, vizadır, konfet kağızı deyil ki, müraciət edən kimi verilsin”
“İran mətbuatında Azərbaycanın Təbrizdəki Konsulluğunda viza verilməsi zamanı süründürməçilik və rüşvət hallarının olması barədə yazılanlar yalandır”. Bunu Lent.az-a eksklüziv açıqlamasında Azərbaycanın İranın Təbriz şəhərindəki konsulu Ayxan Süleymanov deyib. “Azərbaycan Xarici İşlər Nazirliyinin verdiyi təlimata əsasən konsulluqda viza 72 saat ərzində verilir. Həmin 72 saata iş günlər aid deyil”, - deyə konsul əlavə edib.
Konsul İran televiziyasında belə bir informasiyanın yayılmasından xəbərsiz olduğunu deyib: “Bunun İranın qəzetlərdə, internet saytlarında getməsindən xəbərimiz var”.
Konsul deyib ki, bu barədə xəbər harada yayılıbsa yalandır, uydurmadır, qarayaxmadır, təxribatdır: “Konsulluğa kim müraciət edirsə – İran vətəndaşı, ya başqa ölkənin vətəndaşı – qeyd etdiyim kimi, viza 72 saat müddətində verilir. Vizanın ondan tez verilməsi mümkün deyil. Bu, vizadır, konfet kağızı deyil ki, müraciət edən kimi verilsin. Hər gələnə hər dəqiqə viza vermək olmaz ki”.
Qeyd edək ki, İran mətbuatında Təbrizdəki konsulluqda viza verilərkən rüşvət alınması iddiası ilə yazılar dərc olunub, həmçinin saytlarda bu barədə xəbərlər yer alıb.
“Yeni Müsavat” qəzeti isə yazır ki, ötən gün İran televiziyasında (“Səhər” – P.A.) analoji veriliş göstərilib.
Pərvin ABBASOV
LENT.AZ
Hiç yorum yok:
Yorum Gönder