Demokratiya Uğrunda İttifaq İranın Azərbaycandakı səfirinə məktub göndərib

Demokratiya Uğrunda İttifaq İranın Azərbaycandakı səfirinə məktub göndərib


Bakı. Ramil Məmmədli – APA. Demokratiya Uğrunda İttifaq (DUİ) İranın Azərbaycandakı səfiri Nasir Həmidi Zareyə məktub göndərib. DUİ-dən APA-ya verilən məlumata görə, məktubda İranda yaşayan azərbaycanlıların hüquqları, onların milli məsələlərlə bağlı qarşılaşdığı məqamlardan narahatlıq bildirilib: “Aldığımız məlumatlardan bəlli olur ki, İranda yaşayan azərbaycanlılar öz istək və arzularına, həmçinin beynəlxalq qanunvericiliyə uyğun olaraq milli istəklərini həyata keçirə biçmirlər. Bu istəkdə olan tələbələr, müəllimlər və müxtəlif peşə sahibləri həbs olunur, təzyiqlərə məruz qalır. Bütün bunlar isə nə beynəlxalq qanunlarla, nə də insani yanaşmalarla bir araya sığımır”.
Məktubda insan hüquq və azadlıqlarının məhdudlaşdırılması, təqiblərin azaldılması, saxlanılan milli fikirli azərbaycanlıların sərbəst buraxılması da zəruri hesab olunub. Məktubda DUİ-nin Sədrlər Şurasının üzvləri bütün bu məsələlərlə bağlı səfirlə görüşməyə hazır olduqlarını da qeyd ediblər.