ZAHİDAN və TƏBRİZDƏ HƏBSLƏR

Əlirza Cəmşidi
İran adlanan yerin Məhkəmə Sisteminin sözçüsü Əlirza Cəmşidi jurnalistlərə açıqlamasında son günlər Zahidan və Təbrizdə baş verən olaylara görə onlarla insanın həbs edildiyini deyib.

Mayın 28-də axşam saatlarında Zahidan şəhərindəki şiələr məscidinə “Condollah” təşkilatına bağlı bir kamikadzenin intihar əməliyyatında 25-dən çox insan həlak olmuş, 125 nəfər isə ağır xəsarət alıb. Mayın 30-da bu hadisədə təqsirli bilinən “Condollah”ın 3 üzvü dar ağacından asılıb. Bir gün sonra isə Zahidanda sünni bəluclarla İranın hökumət qüvvələri arasında silahlı qarşıdurmalarda hər iki tərəfdən 10 nəfər həlak olub, 100-dən çox insan ağır yaralanıb.

Əlirza Cəmşidi Zahidan və Təbrizdə 30-dan çox insanın həbs edildiyini desə də, İran hüquq mühafizə qüvvələri komandanının əməliyyat üzrə müavini Hüseyn Sacedi Niya jurnalistlərlə görüşündə təkcə Zahidanda 150-dən çox gəncin tutulduğunu vurğulayıb.

Ə.Cəmşidi Təbriz iğtişaşlarında 11 nəfərin həbs edildiyini bildirib. O, hansı iğtişaşları nəzərdə tutduğu barədə açıqlama verməsə də, tutulanların son günlər keçmiş prezident Məhəmməd Xatəmiyə qarşı etiraz aksiyasına qatılanlar olduğu güman edilir.

İran Məhkəmə Sisteminin sözçüsü Təbrizdə tutulanların dövlət quruluşuna qarşı təbliğat aparmaqda, qanunsuz toplantılara qatılmaqda, ölkənin milli təhlükəsizliyinə qarşı çıxmaq üçün silah və partlayıcı maddə saxlamaqda günahlandırıldığını deyib.