Türkiyədə Naxçıvan dialektinə aid ilk kitab nəşr olunub

Kitabı Azərbaycan və Türkiyə alimləri birgə hazırlayıblar

Bu günlərdə Türk Dil Qurumunda AMEA-nın müxbir üzvü Əbülfəz Quliyev, Türkiyə alimlərindən Professor Doktor Tuncer Gülensoy və Dosent Doktor Paki Küçükerin birlikdə hazırladıqları 734 səhifədən ibarət “Naxçıvan ağzı” monoqrafiyası elmi ictimaiyyətin müzakirəsinə təqdim edilib. Bu barədə Lent.az-a AMEA Naxçıvan Bölməsinin Mətbuat və İnformasiya şöbəsindən məlumat verilib.

Naxçıvan dialektinə aid ilk kitab Azərbaycanda 1962-ci ildə nəşr olunub. Türkiyədə isə Azərbaycan dialektologiyasından bəhs edən iki cildlik “Azərbaycan dilinin dialektoloji luğəti” adlı kitab Türk Dil Qurumu tərəfindən bir neçə il bundan öncə Ankarada işıq üzü görüb. Bu baxımdan, Türkiyədə ilk dəfə meydana çıxan həmin irihəcmli monoqrafiyanın böyük elmi əhəmiyyəti var.

Müəlliflərin bölgənin şivə xüsusiyyətlərini toplu şəkildə şərti olaraq “Naxçıvan ağzı” adlandırmaları diqqəti həmin problemə yönəltmək, tədqiqatçıları bu problem ətrafında düşünməyə dəvət etmək məqsədi daşıyır.

Üç əsas bölmədən ibarət olan monoqrafiyanın mühüm bölmələrindən birində bölgədən böyük zəhmətlə toplanmış zəngin şivə materialları öz əksini tapıb.

Monoqrafiyada leksik və qrammatik vahidlərin, yəni söz və şəkilçilərin lüğəti, indeksi böyük bir bölməni təşkil edir. Kitabın sonunda Naxçıvan Muxtar Respublikasının xəritəsi və istifadə edilmiş elmi ədəbiyyatın geniş siyahısı verilib.

Elmar HUSEYNOV

LENT.AZ



Xəbərin oxunma sayı: 103