Terrorçular silahı Azərbaycana necə keçirib?

Daha öncə xəbər verdiyimiz kimi, aprelin 30-da Azərbaycan Dövlət Neft Akademiyasında baş vermiş terror zamanı istifadə edilən silahı Fərda Qədirov Gürcüstandan qanin yolla silah mağazasından alıb.

Onun Gürcüstanda aparılan evində aparılan axtarış zamanı bunu təsdiq edən silahın sənədi tapılıb. Bəs Fərda Qədrov silahı Azərbaycana necə keçirib?

RİA-nın məlumatına görə, bununla bağlı Dövlət Sərhəd Xidməti (DSX) araşdırmalara başlayıb. DSX rəisi Elçin Quliyev bildirib ki, baş vermiş hadisə ilə əlaqədar həm yaşıl sərhəddə, həm də nəzarət buraxılış məntəqələrində müvafiq tədbirlər görülür, Azərbaycan Respublikasının digər hüquq mühafizə orqanları ilə birlikdə zəruri addımlar atılır.

“Qırmızı Körpüdən” istənilən əşyanı keçirmək olar

RİA-nın araşdırmasına görə, “Qırmızı Körpü” Sərhəd Keçid Məntəqəsindən istənilən əşyanı keçirmək mümkündür. Gürcüstanlda əlaqəsi olan hər kəs bunu təsdiq edə bilər ki, “Qırmızı Körpü”dən keçərkən vətəndaşların üzərləri yoxlanılmır. Çox nadir hallarda onların keçirdiyi əl çantalarına baxış keçirilir. Sərhəd Keçid Məntəqəsində metal axtaran qurğu quraşdırılsa da, nadir hallarda ondan istiadə edilir.

RİA-nın Bakı – Tiflis marşrutu ilə işləyən avtobus sürücüləri arasında apardığı sorğunun nəticələrinə görə, bu hadisədən sonra da Sərhəd Keçid Məntəqəsində nəzarət gücləndirilməyib. Vətəndaşların əl çantalarına ötəri baxış keçirilsə də, üzəriləri yoxlanılmır. Hələ də metalaxtaran monitordan istifadə edilmir. Sürücülər bunu, “Qırmızı Körpü”də aparılan təmir bərpa işləri ilə əlaqələndiriblər.

Onların sözlərinə görə, əsas keçid məntəqəsində yenidənqurma işləri aparıldığından vətəndaşlar və qonşu ölkəyə gedib-gələn avtobuslar müvəqqəti keçid məntəqsindən buraxılır. Orada isə sərnişinlərin yoxlanılması üçün heç bir avadanlıq quraşdırılmayıb.

Xatırladaq ki, aprelin 30-da saat 9.30 radələrində Azərbaycan Dövlət Neft Akademiyasının Bakı şəhəri Dilarə Əliyeva küçəsi, 227 saylı ünvanda yerləşən «Qaz Neft Mədən» və «Neft Mexanikası» fakültələrinin yerləşdiyi ikinci korpusa daxil olan naməlum şəxsin inzibati binanın birinci mərtəbəsindən altıncı mərtəbəsinədək qarşısına çıxan hər bir kəsə «Makarov» tipli tapançadan atəş açması nəticəsində 13 nəfər ölüb, 13 nəfər müxtəlif dərəcəli bədən xəsarətləri alıb.

Polis tərəfindən zərərsizləşdiriləcəyini görən silahlı cinayətkar özünü öldürüb.

Cinayətin törədildiyi yer və meyitlər müayinə olunub, məhkəmə-tibbi, məhkəmə-trasoloji, məhkəmə-ballistik və digər ekspertizalar təyin edilib.

Cinayəti törətmiş şəxsin üstündən 1980-ci il təvəllüdlü Gürcüstan vətəndaşı Qədirov Fərda Əsəd oğluna məxsus şəxsiyyət vəsiqəsi, «Makarov» tipli tapança, habelə hər biri 40 güllə tutumlu və içərisində 71 güllə olan xüsusi üsulla hazırlanmış 3 ədəd patrondaş, 2 tapança sandıqçası aşkar edilərək götürülüb.

İstintaq fevralın 11-də qətlə yetirilmiş Azərbaycan Hərbi Hava Qüvvələrinin komandanı Rail Rzayevin də məhz bu silahla qətlə yetirldiyini təsdiq edib.